Roma – Dadeer loron 3 Outubru , Kapitulár sira hola parte iha “Meza kabuar ida”, ho tema Evanjelizasaun ba foin-sa’e ba no ho foin-sa’e sira, hodi konfronta ho Sasin na’in tolu nia esperiénsia: FMA ida, SDB ida no Leiga ida.

Madre Yvonne Reungoat loke enkontru ne’e hodi kumprimenta bainaka sira ne’ebé aseita konvite atu fahe sira-nia reflesaun liga ho tema Kapítulu nian: “Sai ho foin-sa’e sira, uma ne’ebé evanjeliza”.

Marco Pappalardo, leigu Salezianu Kooperadór mak modera “Meza kabuar” ne’e no nia introdús eventu ne’e ho liafuan sira nune’e: Hanesan dixípulu Emaus nian tuir dalan husi atu sira-nia an nakfilak ho enkontru ho Jezús, ohin ita mós sei halo enkontru espesiál: Jezús aprezenta an iha ita-nia Sasin sira nia narrasaun no husi foin-sa’e barak nia moris ne’ebé sira hasoru no hanesan Don Bosco no Madre Mazzarello, sira fó ‘uma’ ida ba sira”.

Ir Agata Song, FMA koreana, responsavel ba uma “Nazareth” ba labarik no foin-sa’e sira iha difikuldade. Hodi fó hanoin kona-ba Papa Francisco nia liafuan kona-ba Kreda ne’ebé “sai ba li’ur” no “A te le affido” Mazzarello nian, nia fahe oinsá FMA iha Korea, liuhusi obra edukatiza oioin, marka prezensa iha periferia sira ezisténsia umana nian,iha-ne’ebé feto-raan sira hetan esplorasaun no abuzu: “Ami iha sira-nia sorin atu tulun sira manán fali sira-nia dignidade umana. Ne’e mak misaun ida ne’ebé ami la lori ba oin mesa-mesak. Hanesan Don Bosco, ami buka atu kria uma ba feto-raan sira ne’e, ambiente ida iha-ne’ebé sira bele dada iis iha klima ida liberdade nian, iha-ne’ebé sira bele empeña an iha relasaun ida resiprosidade nian. Uma sira ne’e hanaran ‘Uma Nazaré nian’. Hodi envolve feto-raan sira ne’e rasik iha rede, ami tama iha rede ho instituisaun seluk no Estadu”.

Hafoin  Padre Jean-Marie Petitclerc, SDB fransés,  responsavel Asosiasaun  ‘Valdocco’ halo ninia intervensaun. Asosiasaun Valdocco iha kompromisu atu tulun foin-sa’e sira iha difikuldade iha periferia Paris nian, iha Argenteuil no iha Lyon. Aprezenta tiha mudansa boboot sira ne’ebé karakteriza kultura joven sira ohin nian ne’ebé iha influénsia ba edukasaun no ba fiar, nia haktuir sá de’it foin-sa’e sira nia espetativa. Foin-sa’e sira iha hamrook ba konfiansa: “Ema labele moris, iha maneira ida eh maneira seluk, lahó kofiansa. Importante atu joven sira kontinua rona Jezús nia hakilar: ‘Imi keta ta’uk!’”, Kona-ba sira-nia hamrook ba enkontru: “Iinternet tulun komunikasaun hakat liu fronteira sira, maibé lkomunikasaun’ la hanesan ho ‘relasaun loos’. Virtuál labele hakonu ema nia hamrook ba enkontru loos. Maski se la hanesan ne’e ba ema barak, presiza hahú husi faktu katak, ba fiar sarani, importan, liu buat hotu, fó priviléjiu ba domin ba ema seluk, iha sentidu katak ema ida-idak mak ha’u nia maluk no ema uluk liu mak nafatin ida ne’ebé kuran, kuran iha naran buat ida”. Ikusnian, foin-sa’e sira hamrook na signifikadu: “Moris vida loron b aloron, garante ‘signifikadu’ ki’ik sira, fasil atu iha asesu bá, la to’o atu fó mai ita kbiit atu hetan ita-nia dalan iha mundu frenétiku ne’e. Ohin loron, joven sira buka signifikadu. Domin de’it mak bele haraik mai ita signifikadu ba vida no domin ne’e nafatin iha dalan “.

Iksumai, Chiara Amirante, fundadora Asosiasaun “Nuovi Orizzonti”, no Consultora ba Sekretariadu Pro Migrantes iha Pontiísiu Kosellu ba Promosaun Evanjelizasaun Foun   fó ninia sasin kona-ba oinsá nia bá iha periferia  sira iha sidade Roma nian hahú ho estasaun ‘Termine’ Roma. Ninia sasin dada atensaun asembleia nian: “Ha’u hahú bá kalan-kalan iha  Estasaun Termini iha Roma iha 1991, ho hakarak simples ida: fahe ksolok enkontru nian ho Kristu Moris-Hi’as liuliu ho maun-alin sira ne’ebé dezesperadu liu. Ha’u la imajina atu hasoru povu ida ne’ebé mohu joven sira-nian, mesak, iha ninin, desfiguradu iha profundidade sira-nia fuan no dignidade, vítima husi infernu nia talin sira no husi eskravidaun aat liu. Foin-sa’e hira mak sai atan, dadur iha iluzaun lalehan artifisiál ida ne’ebé oho sira-nia klamar. Hakilar hira iha silénsiu no terus nian ne’ebé ema ida la see tilun bá; dezesperu hira, hirusm violénsia, deviansa, krime. Maibé hamrook hira ba Maromak nia domin iha fatin ne’ebá, iha profundidade nakukun infernu  estrada nian”.

Hafoin tuir ho diálogu iha Asembleia ne’ebé tulun atu hakle’an liután aspetu sira ne’ebé sira destaka. Buat ne’ebé loos duni akontese, mak hanesan ba dixípulu Emaus nian, sira-nia sasin halo Kapitulár sira nia fuan lakan, lakan ho paixaun ba foin-sa’e sira no paixaun ba Maromak.

Iha loraik Kapitulár sira kontinua reflesaun iha grupu tuir lian, no tuirmai halibur hamutuk atu rona aprezentasaun husi Ámbitu Família Saleziana nian.