Ema kiak husi ninia kiak hatene fó no fó ho jenerozidade

Jacinta Gusmão

Dili, 28 Janeiru 2023

Iha loron 28 Janeiru 2023, Ir Isabel Gomes FMA, misionária iha Brasil  ba tinan tolu ona, fahe ninia esperiénsia misionária ba estudante sira husi 4°-9°ano.

Ba tinan tolu ona mak Ir Isabele Gomes hala’o misaun iha Rai Brasil. Nia haktuir katak iha tinan dahuluk ninia misaun mundu esperimenta pandemia covid-19. Iha Brasil iha mate barak, liuliu ema kiak sira. To’o agora barak mak seidauk simu vasina kontra covid-19, maksi doze dahuluk de’it.

Ho ne’e, Ir Isabel hateten katak, maski Brasil boot, maibé iha ema kiak mós barak. Nune’e, ita presiza hanoin ba sira hodi sai solidáriu ho sira. Nia foti Evanjellu kona-ba feto-faluk ne’ebé kiak no fó buat hotu ne’ebé nia iha, maski sentavus oan de’it. Ema kiak husi ninia kiak hatene fó no fó ho jenerozidade. Nune’e mak Ir Isabel motiva estudante sira atu hanoin mós ema kiak sira iha rai seluk, maski ita Timor-oan mós kiak. Aleinde ne’e, nia mós fó korajen atu sira sai misionária/u, nu’udar voluntáriu/a iha rai misaun. “Sé mak hatene karik husi imi rihun ida, na’in sanulu, ruanulu, limanulu sei sai misionária/u?”

Ir Isabel hola parte ba Inspetoria Madre Mazzarello Belo Horizonte – MG. Nia hela iha komunidade Pio XII ho Irmán na’in 4 hala’o knaar iha “Colégio PIO XII, Obra Social Chiara Palazzoli” ho labarik kiak no vulneravel 134 husi tinan neen to’o tinan sanulu-resin-lima. Misaun seluk mak vizita família vitima iha trajédia Brumadino ne’ebé hamate ema na’in 170.

Estudante sira promete atu reza ba ninia misaun no oferese mós ba nia kontributu ki’ik ida ba nia misaun. Iha EBC Maria Auxiliadora, durante Kuarezma no fulan Outubru, sai ona prátika ida atu estudante sira halo koleta iha kaixa ezmola turma ida-idak nian, atu tulun ema kiak no rai misaun.