Jacinta Gusmão

Dili, 24 Janeiru 2023

Iha festa S. Francisco de Sales, 24 Janeiru 2023, padroeiru Família Saleziana nian, joven na’in rua, Ir Inocencia dos Santos husi Lautém (TL) no Ir Novia Lestari Daeli, husi Sumatra Utara (Indonesia) halo sira-nia profisaun relijioza iha Kongregasaun “Figlie di Maria Ausiliatrice (FMA), iha Uma Provinsiál FMA nian iha Comoro-Dili (TL).

Iha sira-nia formasaun, sira hili pasajen Maromak nia Liafuan ba sira-nia motto: “Hela iha Ha’u no Ha’u iha imi” (Jo 15,4) no pasajen ne’e mak sei tulun sira atu hahú dalan foun ne’ebé ohin sira hili ho modu desizivu. Molok profisaun, sira na;in rua halo retiru ba semana ida no ho Maromak nia grasa, sira hakarak saran an tomak ba Nia hodi serví Nia iha foin-sa’e sira-nia edukasaun.

Missa Santa selebra husi Padre Pregadór Retiru nian, Pe. Transfiguração António Pinto no konselebra husi Pe, Jose San Juan, na’in rua hotusalezianu Don Bosco nian. Iha omilia, padre Transfiguração hateten katak “komuñaun íntima ho Kristu mak segredu fidelidade nian”. Padre husu atu konsagrada sira haburas komuñaun mísitka presiza axétika, liuhusi haraik-an barak, tanba ita atan ne’ebé la serve buat ida. Ita bele halo buat hotu maibé ita atan  folin-laek de’it, ita kumpre de’it ita-nia obrigasaun (kf Lc 17,7). Padre hateten tan katak “hatais mutin husi ulun to’o ain la dehan katak ha’u maka’as… ita la iha buat ida atu gaba an”. Ita hotu sarani sira, leigu/a no konsagradu/a sira, Jezús husu atu ita sai fiél ba ita-nia vokasaun. Jezús la husu susesu iha vida apostoladu, vida estudu, pastorál, vida relijioza, maibé fidelidade! Hodi hela metin iha Kristu mak ita sei fiél to’o rohan. Se ita haraik-an ita sei susesu, se ita foti-an ita sei kona moras ambisaun nian.

Hanoin seluk padre fahe mak kona-ba tempu: “Ita-nia tempu limitadu, ita-nia tempu mak ita-nia vokasaun. Ne’e duni fó ita-nia tempu tomak ba Maromak,katak serbisu ba Nia”.

Depoizde Missa iha almosu konfraternizasaun nian no konvíviu badak. Molok remata Ir Alma Castagna, Provinsiál FMA TIN, subliña katak “primeira profisaun mak inísiu de’it” ba dalan ne’ebé sira sei halo bá oin. Nia husu ba Irmán foun sira atu moris tuir buat ne’ebé sira aprende, haklea’n iha novisiadu, no ba família, husu atu sira kontinua akompaña Irmán sira iha domin no orasaun. Hafoin nia fó sai sira-nia obediénsia: Ir Inocensia ba  Uma Madre Mazzarello, Venilale (TL) no Ir Novia ba Uma Madre Mazzarello Palla (Sumba-Indonesia).