24 Janeiru – Festa S. Francisco de Sales, bispu no doutór Kreda nian

Evanjellu: João 10, 11-18

«Ha’u mak bibi atan di’ak. Bibi-atan di’ak saran nia moris ba nia bibi sira. Maibé ema ne’ebé la’ós bibi-atan, la’os bibi na’in, haree tiha asu-fuik mai, nia halai hodi soe bibi sira, ne’ebé asu-fuik kaer hodi halo namkari. Tan nia ema kontratu, la tau matan ba bibi sira. Ha’u mak bibi atan di’ak, Ha’u hatene Ha’u nia bibi sira, no Ha’u nia bibi sira hatene Ha’u. Nu’udar Aman hatene Ha’u, nune’e mós Ha’u hatene Aman; no Ha’u saran Ha’u nia moris ba Ha’u nia bibi sira. Ha’u sei iha tan bibi seluk ne’ebé seidauk tama iha bibi-luhan ida ne’e. Ha’u sei dada mós sira mai. Sira sei rona Ha’u nia lia, no sei iha bibi luhan ida de’it ho bibi-atan ida de’it. Aman hadomi Ha’u tanba Ha’u saran Ha’u nia moris atu simu fali nia. Ema ida la hasai Ha’u nia moris husi Ha’u; hodi Ha’u rasik nia hakarak mak Ha’u saran moris ne’e. Ha’u iha kbiit atu saran Ha’u nia moris, no mós iha kbiit atu simu fali nia. Ida ne’e mak ukun-fuan ne’ebé Ha’u simu husi Ha’u Aman».

Reflesaun

Figura bibi-atan nian komún iha tradisaun atu hatudu liurai Israel nian no ema fiar-na’in nia relasaun ho Maromak, bibi-atan boot liu. Jezús identifika an ho ilas ida-ne’e, hakle’an no lori ilas ne’e ba realizasaun tomak. Nia mak bibi-atan furak (kalós) no di’ak la’ós de’it iha aparénsia, maibé mós iha kualidade. Nia mak bibi-atan auténtiku, Jezús mak David foun, ulun no gia tuir Maromak nia fuan. Nia mak bibi-atan, la’ós de’it Israel nian, maibé mós “bibi-atan sira seluk nian: hanesan samaritanu sira no jentiu sira, sira Maromak oan ne’ebé namkari no tenke lori hikasfali ba bibi-luhan no ba salvasaun, tuir Aman nia planu.

Saun Francisco de Sales mak bibi-atan furak no di’ak ne’ebé halo Kreda nia oin sai domin-na’in iha tempu ida ho kontraste no luta boboot. Hanesann Kristu, nia entrega no konsume nia moris, la’ós de’it ba bibi sira ne’ebé iha luhan maibé mós ba sira ne’ebé la’o lakon. Nia saran moris ne’e mak loke bibi barak ne’ebé la’o lakon nia matan. S. Francisco de Sales, iha sékulu XVI no  XVII, mak bibi-atan auténtiku, preokupa liuliu atu fó moris rasik, maski hasoru perigu iha situasaun difisil atu evanjeliza, serví ninia dioseze no restaura Kreda nia moris iha dioseze Genebra no Annecy nian. Iha buat hotu nia husi atu prinsípiu domin puru mak gia nia, nu’udar disponibilidade inkondisionál ba Maromak nia projetu. No ida-ne’e mós mak hanorin ema sira ne’ebé hamrook ba perfeisaun kristán.

Di’ak no fó hakmatek ba klamar atu kontempla santu ida-ne’e, lee ninia hakerek sira, bele haree sobresai ninia karidade, pasiénsia no otimizmu. Hun ba ne’e hotu mak esperansa iha Maromak, ne’ebé nia saran an atu serví lahó rezerva ba nia povu.

Francisco de Sales haksolok atu hanoin katak lei tomak bele habadak iha ukun-fuan domin nian no katak ita labele ta’uk atu hadomi ho modu naresin.