Onesiana da Costa

Baucau, 14 Jenieru 2022

Loron 14/1/2023, Baucau-komunidade SDB. Animador sira husi Zona 3 nian katak sentru Venilale, Fatumaca no Baucau ne’ebé hanaran Zonal Baucau hahu ona formasaun ba animador sira, ne’ebé ko’alia kona ba Sai fermentu ba umanidade tomak- estreia 2023 no oradora mak Ir. Ermelinda da Silva, haktuir  katak nu’udar animador oratorio nian oinsa sai fermentu di’ak ba labarik no foinsa’e sira iha oratori; uluknanain presiza hakonu an ho formasaun moral no espiritual liu husi Eukaristia, Maromak nia liafuan no formasaun seluk, atu nune’e sai uluk fermentu di’ak ba an rasik iha familia, sosiedade, hafoin tulun ema seluk atu bele hetan influensia husi ha’u nia prezensa. Ita rasik mak fiar nain sira nune’e presiza mos haburas ema seluk nia fiar liu husi hahalok, le’e Biblia, liafuan, laran sadia, talentus, matenek no fo tulun. Ne’e sai ona nesesidade oratorianu sira nian ne’ebé presiza animador sira nia fo an hodi fahe sira nia fermentu ba labarik no maluk foinsa’e sira, atu tulun malu hodi hasa’e ema ida-idak nia abilidade umana no dignidade moris nian nu’udar Maromak nia  kriasaun. Hafoin kontinua ho perguntas sira ne’ebé tulun animador atu sai fermentu ne’ebé di’ak iha sentru oratorio sira, presiza halo saida? Sira nia resposta haktuir: presiza rona, hakbesik, hanorin lialoos, labele uza forsa no lori sira ba dalan santidade tuir DB nia reseita ba S. Domingos Savio; ksolok, halo di’ak kna’ar no halo di’ak ba ema seluk, ne’e mak animador sira nia fermentu atu fahe ba oratorianu ida-idak. Iha mós sira nia propózito atu prátika iha oratorio: sai mediadora di’ak no prepara labarik sai di’ak liu husi katekeze no orasaun. Ikus ho merenda fraterna hametin liu tan sira nia amizade, hodi fahe ksolok, difikuldade no domin liu husi koñese malu no diálogu.