Noemia de Deus

Comoro-Dili, 15 Janeiru 2023

Dili, 15 Janeiru-Familia Salesiana Zona Dili nian hala’o “Jornada Espiritual Familia Salesiana” ne’ebé iha komunidade Saun José –Novisiadu Komoro no partisipante sira hamutuk besik Ualunulu.

Iha enkontru ida ne’e hahu ho partisipante sira halibur hamutuk iha fatin refere, tuir mai loke ho Selebrasaun Eukaristia ne’ebé preside husi Pe. Mario do Rosario, SDB nu’udar Delegadu Familia Salesiana. Hotu tiha Misa iha liafuan makloken husi Madre Ispetora, Me. Alma Castagna, FMA, hafoin fahe ba grupu ne’ebé sei halo Lectio Divina kona ba Estreia Reitor Maior 2023 nian liu husi dada rifa no iha grupu 5; Estreia kona ba “Sai fermentu ba umanidade ohin nian”Kada grupu iha ema na’in 13-15. Enkontru ida ne’e hala’o atu realiza  Programasaun Ispetoria nian, no atu sintoniza ho Jornada Espiritual Familia Salesiana (JEFS) nian ne’ebé hala’o iha Turino-Italia husi loron 12-15,  husu atu halo enkontru hamutuk Familia Salesiana nian nune’e mos iha Filipina hala’o JEFS husi loron 13-14, parte Ázia Pasífiku no iha Timor hala’o ohin hodi taka hamutuk Jornada Espiritual Familia Salesiana.

Iha Selabrasaun Eukaristia, iha homilia Padre dehan: “Iha Evajellu ita rona kona ba naroman nune’e ita mos tenke sai naroman ba ema seluk. Mai ita Familia Salesiana laos deit atu sai atan atu halo tuir deit buat ne’ebé superior sira hateten, maibe ita mos sai roman, sai kreativu no halo buat ruma ne’ebé iha ita nia situasaun atu rona ba ema iha tempu no fatin ne’ebé ita hela ba”. Iha lian makloken, Me. Alma dehan: “Hau kontente haree imi hotu iha ne’e, atu fahe Maromak nia Liafuan iha Lectio Divina ne’ebé imi sei hala’o iha loron ne’e. Maromak hatene sujere ba imi nia dalan buat ne’ebé hau nia liafuan labele to’o, maibe atu fo hanoin deit ba imi iha Estreia ida ne’e iha aman balun, iha ema ne’ebé animador oratorio ne’ebé kontinua tau iha ita nia oin, hanesan buat ne’ebé padre dehan iha Misa kona ba sinal no sasin iha ita nia moris. Ita koalia barak liu fali hahalok. Buat ne’ebé hau hein husi Familia Salesiana ida-idak iha fatin bele moris diak no sai sinal kona ba Maromak nia domin. Ida-idak bele komesa nia dalan santidade nian karik balun iha ona klaran, balun kuaze to’o ona santidade, importante mak iha dalan ida ne’e ita nafatin hanoin katak Maromak akompaña ita no hein ita iha Lalehan, obrigada no servisu diak ba imi hotu”.

Husi eventu ida ne’e lori membru Familia Salesiana ida-ida atu sai konsiente liu tan ba sira nia kna’ar no tulun sira atu servisu hamutuk iha tempu sira tuir mai. Nune’e sira sei hare hodi realiza atividade ne’ebé marka ona ba fulan Abril nian.