Notísia di’ak, evanjeliza di’ak

Adelaide G. Almeida

Comoro-Dili, 15/01/2023

Loron 15 Janeiru 2023, realiza formasaun ba referente Komsos kada komunidade nian, ne’ebé partisipa husi Irmán na’in 10 husi Komunidade: Divina Providénsia, Maddalena Morano, Rosetta Marchese, MA, Laura Vicuña, Eusebia Palomino, J.Bosco no S.José. Formasaun ne’e realiza iha Salaun Laura Vicuña, Komunidade Eusebia-Comoro.

Formasaun hahú ho orasaun no kontinua ho koñesimentu ba aplikasaun sira ne’ebé eziste iha Programa Komputadór hanesan: Windows Movie Maker, Paint no Power Point. Ho formasaun ne’e kapasita referente sira atu halo notísia ho efikásia ba Website FMA no Pájina Facebook FMA Tatoli.

Ir. Jacinta Gusmão, FMA, ne’ebé fó formasaun refere haktuir katak “buat ne’ebé atu tau nu’udar notísia mak tenke: importante, faktuál, resente, objetividade no hakerek korretamente tuir ortografia dalen ne’ebé uza”. Hakerek nia estrutura mak pirámide invertida, katak hahú husi buat ne’ebé importante liu ba buat ne’ebé ladùn importante.

Ho Formasaun ne’e sei tulun Irmán referente sira bele atualiza informasaun no fahe ho d’iak liután buat hotu ne’ebé komunidade ida-idak realiza iha sira nia fatin, basá halo notísia di’ak katak evanjeliza di’ak.