Falta fulan ida nune’e ba inísiu (11 Outubru), konvein atu para no reflete uitoan kona-ba esperansa sira liga ho Tinan Fiar nian. Tanba sá Bento XVI hakarak atu iha mundu tomak Kreda haka’as an iha dalan ida-ne’e? Nia motivu  mak signifikadu no importánsia fiar nian, fundamentalmente, enkontru ho Kristu. No ba enkontru ida-ne’e  Pedro nia Susesór dedika ninia enerjia tomak: defaktu Nia iha knaar atu lori ba Kristu ema hotu.

Bento XVI iha inísiu ninia pontifikadu nian konvida bispu no fiar-na’in hotu atu sai husi rai-fuik maran hodi bá “fatin vida nian, fatin amizade nian ho Maromak nia Oan, bá hasoru ida-ne’ebé haraik moris mai ita, moris iha plenitude” (omelia iha inísiu  pontifikadu).

Iha dezertu ida atu husik, iha ne’ebé fiar terus. La’ós dezertu bíbliku, iha ne’ebé Maromak ko’alia ba ema nia fuan, maibé fatin ida mate nian, iha ne’ebé buat ida la moris. Ita hela iha dezertu bainhira sarani sira “sente preokupasaun boot ba konsekuénsia sosiál, kulturál no polítika duké fiar ne’e rasik, hodi kontinua hanoin fiar nu’udar presupostu óbviu sira nia empeñu lorloron nian (Porta fidei 2). Ita hela iha dezertu bainhira, sarani sira hanoin katak fiar maka faktu privadu no individuál ida, bainhira falta responsabilidade sasin nian, nu’udar ezemplu, kona-ba tema importante sira tuir étika. Sei hela iha dezertu mós, bainhira la buka razaun sira tan sá fiar (kf Porta fidei 10). Sei hela iha dezertu bainhira mentalidade kontemporánea redús ámbitu serteza rasionál sira ba konkista sientífika no teknolójika sira” (Porta fidei 12): buat mesak ne’ebé loos maka siénsia sira ne’ebé bele esperimenta. Sei iha dezertu mós bainhira husi fiar la hakat liu ba sasin karidade nian no esperansa nian (kf Porta fidei 14-15). Dezertu ida hanesan ne’e kondena ba mate fiar auténtika. Oinsá bele hela hakmatek, bainhira iha parte barak mundu nian parese fiar lakon daudaun ona?

 

Urjente halo dalan, intensifika reflesaun kona-ba fiar, atu iha Kristu sai konxiente liután no habiit adezaun ba Evanjellu (kf Porta fidei 8), atu ita-nia matan hateke metin ba Jezús Kristu “autór no konsumadór fiar nian” (Eb 12, 2) (Porta fidei 13).

Urjente deskobre filafali konteúdu fiar ne’ebé haklaken, selebra, moris no reza no urjente mós halo kompromisu atu reflete kona-ba hahalok fiar ne’ebé iha (Porta Fidei 9). Basá la to’o koñesimentu konteúdu nian se fuan nu’udar sakráriu auténtiku ema nian la loke ba grasa, se la fó sasin no halo kompromisu públiku (kf Porta fidei 10) no sasin karidade nian (kf Porta fidei 14). Husi Maria, Apóstolu sira to’o ita-nia tempu konfesór no martir sira fiar nian fó sasin kona-ba fiar nia beleza to’o saran moris rasik, nune’e mai ita mós badinas atu hametin fiar no halo ita-nia relasaun ho Jezús Kristu firme ba beibeik, basá  iha Nia de’it maka ita iha serteza atu hateke ba futuru no garantia domin auténtiku no lanahas. Nia ne’ebé manán aat hotu no mate (Porta fidei 15) maka razaun ba ita-nia esperansa sira.

Download Porta fidei (Indonesia)