Papa Francisco nia katekeze iha kuarta, loron 1 Outubru kona-ba Kreda nia karizma sira. Amu- Papa hateten katak karizma mak don ida ba Kreda, la’ós ba motivu inveja eh divizaun nian.

Papa Francisco kontinua siklu katekeze kona-ba Kreda, no horisehik ko’alia kona-ba don sira ne’ebé Espíritu Santu oferese ba nia iha ninia dalan iha istória. Iha linguajen komún, bainhira ko’alia kona-ba “karizma”, ema hanoin kona-ba talentu, maibé iha perspetiva sarani, nia asume signifikadu ne’ebé hakat liu kualidade pesoál.

Download

Karizma, mak grasa ida, don ida Maromak haraik hodi Espíritu Santu nia serbisu, atu uza ba ema hotu Defaktu, iha komunidade nia laran de’it mak ema bele rekoñese karizma sira ne’ebé nia iha.

Ema ida-idak husu ba nia an se iha  nia iha karizma ruma: “Iha ha’u iha karizma ruma ne’ebé Na’i halo moris iha ha’u no iha-ne’ebé ha’u-nia maluk sira, iha komunidade sarani rekoñese no enkoraja? No oinsá ha’u-nia komportamentu hasoru don ne’e: ho laran-luak ga ho motivu orgullu nian?”

Buat furak liu, tuir Papa Francisco mak esperiénsia atu deskobre diversidade no multiplisidade karizma sira-nian iha Igreja, basá hotu-hotu don husi Aman ba  komunidade atu nia buras ho armonia nu’udar isin ida de’it: Kristu nia isin. “Susar mai ita se ita halo don sira ne’e nu’udar motivu inveja eh divizaun nian!”, nia fó hanoin.

Iha Maromak nia matan, karizma hotu importante, Papa Francisco hateten. Iha komunidade sarani ida nia laran, ema hotu presiza malu no don hotu ne’ebé ida-idak simu bele realiza didi’ak bainhira fahe ho maluk sira no ba ema hotu nia di’ak. Ikusmai, Amu-Papa fó hanoin katak Kreda loron 1 Outubru selebra Santa Teresinha do Menino Jesus, mat eho tinan 24. “Nia hakarak soi karizma hotu”. Maibé, iha orasaun mak Santa Teresinha deskobre katak ninia karizma mak domin. Ida-ne’e mak karizma ida ita hotu iha. “Mai ita husu ba Santa Teresinha kapasidade atu hadomi Igreja no aseita karizma hotu, ho domin oan sira-nian.”