Dili – Membru sira Komunidade Edukativa núkleu Eusebia Palomino nian halo enkontru hodi elabora programasaun ba tinan 2023. Partisipa iha enkontru ne’e inan-aman na’in neen, profesór/a na’in hitu no Irmán na’in neen. Programasaun hahú ho orasaun, invoka Espíritu Santu, leitura evanjélika kona-ba ai-knanoik fermentu nian (Lc 13,20-21), haree video estréia 2023 iha lia-tetun no hafoin invoka Maria nia prezensa hanesan iha Kaná atu hanorin ita “sai prezensa ne’ebé hatene rona, prezensa ne’ebé la’o hamutuk no prezensa komunitária ne’ebé ‘sai’ no iha rede”.

Tuir orasaun hahú kedas aprezentasaun projetu inspetoriál ninia objetivu sira no hafoin fahe ba grupu tolu atu tuir objetivu tolu hodi haree dezafiu sira no liña asaun no modalidade konkreta atu implementa.

Hotu tiha serbisu iha grupu, depoizde pauza, halo asembleia atu aprezenta grupu ida-idak nia serbisu hodi buka liña konverjénsia sira no mós fahe hamutuk oinsá bele lori bá oin. Grupu núkleu animadór ne’e iha tebes interese atu sai fermentu di’ak, atu hala’o / atua pedagojia ida ambiente nian hodi lori mudansa ida ba sosiedade ne’e, hahú husi ida-idak nia an no ambiente.

Grupu animadór estabelese atu iha enkontru regulár kada fulan rua, nune’e bele hametin komuñaun, partisipasaun no misaun.

Enkontru programasaun ne’e fasilita husi Ir Jacinta Gusmão FMA: iha etapa dahuluk FMA sira mak tur hamutuk iha loron 2 Janeiru 2023 no etapa daruak FMA sira tur hamutuk fali ho leigu/a no profesór/a sira ne’ebé halo iha 7 Janeiru 2023.

(JG)