MINI KONGRESU MJS

Dili-Comoro, 6/1/2023, reprezentante animador sira husi zona I-IV ho padre, madre no frater sira nebe hamutuk ho foinsa’e sira, hodi halibur hamutuk tuir mini kongresu MJS ne’ebé fahe ba parte II: Formasaun no plano formasaun zonal nian.

Parte dahuluk hahu ho jogos kuinese malu no konferensia sira kona ba Estreia 2023 no manual MJS ba animador sira atu bele hatene di’ak liu tan sira nia identidade, espiritualidade no misaun nudar MJS. Uluk knanain hahu ho formasaun kona estreia 2023 prezide husi me.  Esmeralda Soares, FMA, haktuir katak; estreia mak don ne’ebé tulun ita atu la’o tuir no ita simu bolun atu fó no kompleta malu iha misaun Salesiana nian. Hanesan haktuir iha estreia 2023; sai fermentu ne’ebe di’ak ba umanidade tomak ohin loron nian. Hafoin kontinua ho apresenta Manual MJS husi Madre Julia. Maibe molok hahu, fo tempu uluk ba Madre Alma, provincial FMA hodi hato’o ninia mensajen ba foinsa’e sira no haktuir hahalok oinsa hahu hakerek Manual MJS ho esplika klaru kona ba MJS katak ”movimentu juvenil salesiana” movimentu ne’ebé ba foinsa’e sira, buat hotu iha foinsa’e nia liman, hodi fo kontribuisaun ba Igreja tuir espiritualidade Salesiana no presiza hatene ita nia karakterístika. Iha mós aspetu nu’udar ita nia empeñu polítika mak sai sensivel ba bem komun. Madre konvida acompagnador haklean sira nia we matan atu hatene haroman foinsa’e sira no orienta foinsa’e animador sira atu hatene didiak sira nia identidade no sira nia misaun. Ikus liu Madre fo parabens ba estrutura foun ne’ebè se hetan fiar husi asemblea atu bele hala’o misaun ho responsabilidade no ho fiar.

Hafoin me. Julia haklean liu tan Manuel MJS hodi fo hanoin fila fali kona ba MJS nia vizaun, misaun no espiritualidade hodi hafanu fali animador ida-idak atu hariku-an no habelar liu tan espiritualidade DB nian atu lori komuñaun ho Kreda no sosiedade hodi serbí foinsa’e sira no hamutuk harii sosiedade foun no Reinu Maromak nian iha mundu ida ne’e. Depois de rona joven nia preukupasaun, perguntas, klarifikasaun no proposta kontinua kedas ho momentu votasaun ba presidente MJS no nia membro sira. Ida ne’ebè hetan votante no konfiansa husi Zona sira mak animador Arnaldo da Costa (Aldo) ne’ebé sai prezente ba tinan 2023-2025.

Depois de tempo han meudia, assemblea hamutuk ho estrutura foun kontinua kedar ba parte rua hodi plano formasaun annual ho tema no kalendario ba formasaun zonal no pastoral konjunta molok remata ho Santa Misa ho kompromisu estrutura foun nian. Santa Misa  prezide husi pe. Albino, SDB. Iha homilia haktuir fila fali reseita 3 ne’ebé Don Bosco fo ba S. Domingos Savio hodi tulun nia sai santo. Padre mos konvida estrutura foun no animador hotu atu moris tuir proposta santidade nian nebe Don Bosco fo ba joven sira. Padre konvida foinsae sira katak atu sai santu, animador nia sentru mak Eukaristia hodi lori ema ba Maromak. Se animador ida Jesus horik iha nia fuan, ida ne’e mak ninia ksolok salesiano atu lori presente ida ne’e ba nia maluk sira. Ksolok mak karakteristika ida foinsa’e MJS sira. Wainhira ita haksolok diabu tauk ita. Ema nebe triste diabu la husik nia.

Ikus liu, Madre Julia hato’o agradase wain ba Maromak, ba ema hotu ne’ebe presente iha mini kongresu ne’e ho domin,  dedikasaun no laran manas apostolado hodi forma-an hamutuk ba misaun ida nebe simu tutan husi Fundador. Ikus liu agradese ba estrutura tuan nebe hala’o ona serbisu iha tinan barak nia laran hodi kontinua moris nudar membro MJ sai joven apostolo ba joven iha fatin hotu nebe hela ba no kontinua serbisu hamutuk hodi tulun malu iha dalan santidade nian.

Obrigada barak.

(Sr. Onesiana, FMA)