Dili – Irmán no família sira hamutuk, inklui OPIAM balun, selebra Loron Famílai nian ho Santa Missa, prezide husi Pe. José Valdir Sequeira, Cavanis, ho Almosu konfraternizasaun ho ai-han partillada, ho jogu sira no ho aprezentasaun knanauk no dansa.
Iha omilia Pe. José husu ba família sira atu hateke ba Família Nazaré nian: Maria, José no Jezús nia família mak modelu; família ezemplár iha vida santidade, iha vida uma-kain iha sosiedade… Papa Francisco dedika ba família hodi soleniza no dignifika moris família iha uma-kain, oinsá, aman, inan no oan moris iha domin no hatudu Maromak nia domin no ida-idak hatene hala’o nia knaar iha uma-kain ne’e. “Família nu’udar núkleu i sélula sosiedade umana, nasaun no Kreda. Tan ne’e família di’ak, família saudavel, nasaun di’ak no forte, Kreda mós di’ak no forte”. Tema ida-ne’e importante liu iha Konsíliu Vaticano II.

Hodi refere ba leitura dahuluk Padre José dehan katak “livru Ben-Sira konvida ita atu hahí ita-nia aman no inan hanesan Maromak nia lalatak iha família; fó hanoin atu ita hotu nu’udar oan bele komprende didi’ak ita-nia obrigasaun nu’udar oan ba aman-inan iha uma-kain. Leitura daruak husi S.Paulo nia Surat ba Colosso, konvida ita hotu atu moris iha famíli ho laran-luak, laran-kmaus, haraik-an, pasiénsia ba malu… pasiénsia dalabarak la iha, perdua malu no kmanek liu ida-ne’e mak hadomi malu. Domin mak hahalok kmanek liu hotu iha uma-kain. Iha Evanjellu ko’alia kona-ba devér no responsabilidade aman no inan nian ba oan iha família”.

S. José liuhusi mehi simu notísia atu sai, halai, tanba Erodes hakarak oho Labarik-Oan. Papa Francisco deklara tinan S. José tinan rua liubá iha-ne’ebé ita medita kona-ba S. José nia mehi haat. Mehi ida mak haruka José ba Ejitu no liuhusi mehi konvida atu filafali ba nia rain…
“Mai ita reza ba malu, ba familia hotu, ba sira ne’ebé labele mai tan udan. Ita kontinua sai ida de’it iha orasaun: Família ne’ebé harohan hamutuk, hela nafatin hamutuk”, Padre José Sequeira remata.

Obrigada ba família raan nian, ba família vokasaun nian. Obrigada ba labarik, adolexente no foin-sa’e sira, ne’ebé sai razaun ba ami-nia vokasaun! Tinan Foun 2023 nakonu ho Maromak nia bensan no protesaun.