Ita selebra daudaun ksolok naximentu Jezús nian, ba loron ualu Kreda moris ksolok ida: ita-nia Na’i no Makso’in Jezús Kristu nia moris.

Jezús, hodi moris mai transforma ema sira ne’ebé simu Nia nu’udar Maksoi’n. Tanba ne’e mak iha loron dahuluk Oitava Natál nian, ita simu grasa atu selebra Santu Estevão, mártir dahuluk atu saran nia moris ba Jezús nia kauza.

Estevão konverte an ba Evanjellu, nia aseita Jezús nu’udar Na’i no Makso’in ba nia moris, no husi loron ne’ebá, nia sai ema foun, nakonu ho kbiit Espíriu nian, husi loron ne’e moris mai mane ida apaixonadu ba Na’i no Makso’in Jezús Kristu. Estevão nakonu ho Jezús; iha ninia ibun, iha ninia hahalok sira, iha ninia atitude sira, iha buat hotu, Jezús prezente iha nia, Nia harohan, haklaken, fó sasin, proklama no moris intensamente Jezús nia moris iha ninia moris rasik

Jezús moris mai ita hotu no ita-nia moris hahú iha sentidu tanba Niia no iha Nia. Rekoñese Jezús nia naximentu katak moris hodi Nia naran, no buat hotu ne’ebé Estevão hala’o, mak moris ida hala’o iha Jezús nia naran.

Jezús nia moris inkomoda ema barak, tanba ne’e ema barak persege Nia husi kedas ninia naximentu, no ema sira ne’ebé moris utir Jezús ho koerénsia moris nian inkomoda mundu no ninia realidade sira. Jezús mai atu inkomoda, tan motivu ne’e, ita keta ta’uk atu inkomoda. Ita-nia preokupasuan ida mesak mak bainhira Evanjellu la inkomosa ita-nia interiór, ita-nia moris akomoda an ho moris morna, ho salan sira, ho ninia normalidade. Evanjellu tneek hasia ita husi komodidade ne’ebé ita horik bá.

Tanba ne’e mak Estevão doko, inkomoda ema barak, no une’e mak, hanesan sira halakon Kosok-Oan nia moris bainhira Nia boot ona, Mane Makso’in Na’i Jezús, sira mós halakon Estevão nia moris.  Estevão la agradese de’it ema  sira ne’eb’e hasia nia moris, maibé nia rasik entrega nia moris. Ida ne’eb’e Nia hadomi iha nia moris, nia mós hadomi iha mate; no Nia mate nu’udar nia moris: hodi hadomi no perdua.

Santu Estevão hanaran nu’udar Protomártir basá nia mak mártir dahuluk istória katólika tomak. Ninia martíriu akontese entre tinan 31 no 36 era Sarani sira-nian. Kreda selebra ninia loron depoizde Natál, atu hatudu sai mai ita katak Maromak ne’ebé tun husi leten aas ba, sai Kosok Oan moris iha balada han fatin atu salva ema, husu mós mai ita atu fó sasin ho korajen Ninia Evanjellu hodi fó glória ba Maromak.

Atu Santu Estevão, mártir dahuluk Igreja nian, hanorin ita atu moris domin apaixonadu ba Kosok-Oan Jezús, atu ita bele lori mós moris ida hodi Ninia naran.