Dili – Ohin loron 23 Dezembru 2022, oratóriu Zeferino Namuncura sentro B no Sentru C selebra festa Natal nian hamutuk ho bainaka husi Australia (Sidney), atualmente hela iha Timor-Leste ne’ebé iha domin boot ba kiak sira, hakat ba vizita oratoriano sira. Bainaka sira mak señora Ilona Evans hamutuk ho nia oan nain tolu (Amelia Preston, Elka no Fletcher Evans) no mós mana Bety, alin Natanael no maun Mario nu’udar akompañadór/a. Oratorianu sira hamutuk simu ho dansa bem-vinda no tara tais ba família sira tuir ita nia tradisaun akolensa nia ba sira.

Família sira sente kontente tan bele hetan oportunidade hasoru oratorianu sira hodi halo amizade maske iha tempu badak nia laran hodi fahe ksolok hamutuk ho oratorianu sira. Agradese ba sira nia laran luak ne’ebé prepara mós merenda hamutuk no fahe mos prezente furak Natal nian ba oratoriano sira hanesan lapis-kor no kraion. Sira hotu simu ho ksolok tamba família sira bele mai vizita oratorianu sira maske ho kondisaun fatin nian ne’ebé mak la dun favorese.

Iha tempu hanesan mós Grupu Asosiasaun Auxilium ne’ebé fó sira nia kontribuisaun ba oratorianu sira nu’udar oferta Natal nian hanesan fos, supermi no rinso. Oratorianu sira simu ho ksolok no agradese ba ba grupu Auxilium nia kriatividade hotu. Iha festa Natal simples ida ne’e família husi oratorianu balun nia parente sira mós partisipa, no sira rasik mós suporta no kolabora hamutuk iha momentu asististénsia nian.

(Martinha Gomes-Abelita Babo FMA)