Dili – iha 16 Dezembru 2022, loron dahuluk Novena Natál nian, Komunidade Edukativa EBC Maria Auxiliadora halibur hamutuk hodi prepara an ba Natál. Preparasaun ka retiru ne’e nia programa konsiste iha konferénsia, Konfisaun no Eukaristia. Pregadór ba retiru mak Pe. Plácido Freitas SDB. Konferénsia husi Pe. Plácido, kona-ba Estréia Reitór-Mor nian ba tinan 2023: “Hanesan Fermentu iha Família Umana ohin. Dimensaun laikál Don Bosco nia Família nian”.

Sai fermentu iha mundu

Pe. Plácido aprezenta elementu prinsipál tolu: fermentu, família umana, leigu. Depoizde aprezenta signifikadu fermentu nian ihaTestamentu Tuan no Testamentu Foun, padre foti konkluzaun katak, fermentu subliña “inkarnasaun” Jezús nian, lori Maromak nia Reinu mai iha mundu, ne’ebé maski serbisu iha silénsiu nia lori fekundidade no kreximentu. Jezús nia inkarnasaun halo atu realidade temporál sai fatin revelasaun mistériu Maromak nian; ema sai templu Espíritu Santu nian, fatin enkontru nian ho Maromak.

Nia mós esplika signifkadu leigu ne’ebé mai husi lia-gregu, katak “povu”. Jezús hanorin mai ita, liuhusi orasaun Ami Aman mós, katak Maromak de’it mak Aman. Ita hotu mak “povu” no hotu-hotu maun-alin. Nune’e separasaun bele iha maibé iha knaar. Leigu nia misaun tuir Konsíliu Vaticano II mak jere sasán temporál hodi lori ba Maromak; santifika mundu husi laran. Ne’e duni entre leigu no na’ilulik sira ka relijioza/u sira iha resiprosidade, komuñaun, solidariedade, karidade.

Família Saleziana nia knaar mak sai fermentu iha família umana. Ba foin-sa’e sira sai santu ho reseita ne’ebé Don Bosco fó ba Domenico Savio: haksolok, hala’o knaar didi’ak no halo di’ak ba maluk sira  . Aleinde ne’e hakaas an no forma an iha polítika, forma aas liu karidade nian

Ba Família Saleziana sira seluk, sai fermentu iha família umana katak realiza dimensaun laikál vokasaun saleziana nian.

Fó sasin ba malu

Iha omilia durante S. Missa, hodi komenta Batista no Jezús nia personajen, Pe. Plácido hateten katak, santu sira fó sasin ba malu. Batista fó sasin kona-ba Jezús no Jezús kona-ba Batista; Don Bosco ho Main, Don Bosco ho D.Savio… Ita presiza iha rekoñesimentu resíproku, no ne’e ajuda kria komuñaun, resiprosidade hodi rekoñese ida-isak nia karizma.

Iha enkontru ho Jezús “cum panis”, maluk viajen nian; ho “Emanuel”, Maromak ho ita ne’ebé lori mudansa ba ita-nia moris, ita bele habelar Maromak nia Reinu, Maromak nia estilu, nune’e kria sosiedade iha-ne’ebé ukun justisa, fraternidade no tau matan ba kriasaun, ita-nia uma komún.

(JG)