Kapítulu Jerál online

Roma – Ohin, 29 Setembru, festa Arkanju Miguel, Gabriel no Rafael, Kapitulár sira  ho sira-nia protesaun kontinua iha klima orasaun, dixernimentu no komuñaun nian atu bele halo leitura realidade nian hodi foka iha pergunta “oinsá haklaken Jezús iha mundu ida ne’ebé troka, iha jerasaun ida ne’ebé muda?”

Iha parte dadeer to’o tuku lima loraik, kapitulár sira dedika ba reflesaun pesoál no momentu partilla nian ba núkleu dahuluk pergunta sira-nian. Irmán sira fahe ba komisaun sanulu-resin-tolu, konfronta ho Surat Konvokasaun ba Kapítulu, Instrumentu serbisu nian, Relatóriu no dokumentu seluk, buka individua dezafiu sira, mudansa mentalidade no hilin sira (másimu tolu) ne’ebé sira haree mai husi realidade husi perspetiva evanjelizasaun nian. Serbisu boot ba sekretária sira ne’ebé tenke halo sínteze ba resposta hotu, ne’ebé ikusmai kapitulár ida-idak sei estuda hodi fó observasaun sira. Integra hotu observasaun sira, dokumentu ne’ebé sei fó ba kapitulár sira nune’e iha momentu asembleia bee fó intervensaun oportuna sira tuir regra ne’ebé estabelese ona.

Iha  tuku 18-15, Konselleira ba ámbitu pastorál juveníl, Ir Maria del Carmen Canales, hato’o aprezentasaun Ámbitu Pastorál Juveníl ninia dalan iha seséniu ne’e. Tuir nia, ámbitu nia misaun mak akompañamentu no formasaun Koordenadora Pastorál Juveníl  (PJ) nian atu anima misaun entre foin-sa’e sira tuir Modelu Pastorál Juveníl ne’ebé Institutu propoin iha Liña Orientadora sira ba Misaun Edukativa (LOME).

“LOME mak dokumentu ida ita tenke halo sai ita-nian tanba nia mak dokumentu própriu ita FMA nian”, Ir Canales hateten. Dokumentu própriu Institutu nian ne’e fó liña orientasaun nian ba misaun edukativa FMA nian no esplisita prátika artigu Konstituisaun FMA nian kona-ba misaun ho proposta esensiál foun no adapta atu fahe ho membru sira komunidade edukativa nian. Livru Mara Borsa nian “L’animazione della Pastorale giovanile nell’Istituto delle Figlie di Maria Ausiliatrice (1962 – 2008). Elementi di sintesi e linee di futuro (LAS – Roma, 2010)”, hatudu dalan istóriku PJ nian no husu mudansa metodolójika no terminolójika no implika “konversaun pastorál”.

Ámbitu pastorál juveníl iha seséniu ne’ebé atu remata daudaun halo dalan asunsaun graduál vizaun unitária PJ nian. Ámbitu privilejia vizita animasaun pastorál ba Inspetoria sira; halo prosesu kontinuidade nian; iha mudansa mentalidade nian “husi jestaun ba animasaun”.

Foin-sa’e sira mak “Terra Santa” ne’ebé Maromak moris bá, ko’alia mai ita. Koordenadora PJ tenke sai ema ne’ebé iha kapasidade atu reflete iha atitude ida konversaun nian, orienta an ba formasaun pastorál integrál.  Nune’e, figura koordenadora nian mak figura-xave atu garante asaun pastorál ho kritériu unitáriu iha ambiente edukativu oioin.

PJ presupoin komunidade edukativa ida ne’ebé núkleu animadór mak anima, iha pluralidade ambiente nian (oratóriu, internadu, eskola…) iha-ne’ebé fekit fuan oratorianu; komunidade edukativa ida ho abut iha espiritualidade juveníl ho kapasidade atu promove Movimentu Juveníl Salezianu (MJS), ne’ebé orienta misaun edukativa liuhusi edukasaun evanjelizadora no moris pastorál juveníl misionária ho objetivu atu akompaña joven sira ba enkontru ho Jezús.

Hafoin aprezentasaun remata ho pergunta ruma husi asembleia kona-ba oinsá haklaken Jezús ho modu esplísitu iha ambiente la’ós sarani, kona-ba knaar leigu sira nian iha ambiente ne’ebé falta referente PJ nian, oinsá kolabora ho pároku sira atu haburas MJS no mós oinsá integra dalan Loron Mundiál Juventude Internasionál iha PJ.