Vizita Kanónika Madre Provinsiál iha Komunidade Madre Rosetta Marchese

Cassa (Ainaro) – Ho ksolok boot, ami Irmán no oratorianu sira iha komunidade Cassa, iha 12 Dezembru 2022, simu ita Madre Alma Castagna nu’udar Provinsiál Timor-Indonesia iha ami nia leet. Ami agradese Madre ne’ebé ho laran kmaan mai vizita ami Irmán, labarik no foin-sa’e sira iha Cassa. Vizita Kanónika mak eventu importante atu hametin tali komuñaun entre Irmán sira no misaun ho espiritu família nian. Nune’e ami fiar ho madre nia prezensa iha vizita ida-ne’e sei hametin  liután ami-nia uniaun ho Maromak no Institutu. No tempu hanesan ami mós agradese ba Madre tan fó mai ami Irmán  ida tan: Ir. Domingas da Silva atu tulun ami labarik no foin-sa’e sira atu buras iha moris fiar nian no tulun ami sai ema di’ak.

Eventu badak simu Madre Provinsiál mak tuirmai:

Oratorianu sira fó benvinda ba Madre provinsiál  iha igreja S. José nia oin. Ho sira nia Liafuan benvinda-tara tais nian, hatudu sira nia ksolok ba madre nia prezensa, hatudu sira nia ksolok liuhusi dansa sira. Tuir mai hamutuk nu’udar família ida, entrega Vizita Kanónika Madre nian iha Na’i-Feto nia liman ho símbolu halakan lilin ida. Husi fuan ami hasa’e hahí no agradese ba Nai ho knananuk ba Maria.

”Ho ksolok boot ita hahí Nai tan Nia kmanek no domin konkretu ne’ebé Nia hatudu mai ita liu husi Vizita Kanónika Madre Provinsiál nian iha ita nia leet.

Mensajen badak husi madre Provinsiál

”Haksolok iha Na’i nafatin, dala ida tan Ha’u dehan: haksolok bá! Halo ema koko imi nia laran di’ak, Maromak besik hela.” (Fl 4,4) Ha’u konvida imi atu haksolok nafatin hanesan S. Paulo dehan tanba wainhira ita haksolok Jesus no Maria sei hatudu nafatin dalan mai ita no lori ita ba ksolok loos nian iha Aman Maromak…

Eukaristia

Lokraik, momentu selebrasaun Eukaristia nian, selebra husi pe. Eugenio Redentor (vigáriu pároku). Ho intensaun reza ba mader nia vizita Kanónika iha komunidade FMA, nafatin partisipa husi oratorianu sira no mós aman-inan balun. Padre konvida labarik no aman-inan sira ne’ebé partisipa Misa, atu haksolok nafatin no agradese ba Maromak nia laran diak, ba Madre provinsiál nia vizita no lori mós prezente ida: fó tan Irmán ida (Ir. Domingas da Silva) ne’ebé sei hola parte iha komunidade FMA Cassa.

(Domingas da Silva FMA)