Formasaun animadora nian bele dehan kestaun fundamentál ida ba Institutu nia vida. Iha relatóriu Madre Antonia nian ba KJ XXII nia evidensia katak estilu foun animasaun no governu nian ne’ebé Projetu Formativu indika nu’udar “koordenasaun ba komuñaun” seidauk asimila no hala’o di’ak. Ida-ne’e tanba prosesu ida naruk ne’ebé “tau iha sentru domin no la’ós podér, di’ak komún no la’ós prestíjiu pesoál ka grupu nian”.

 

Foin daudaun ne’e mós, ir Piera Cavaglià hateten iha enkontru akompañamentu nian iha Japaun katak, “kapasidade fraka animasaun no governu nian” sai ameasa ida husi laran ba vida relijioza, nune’e “labele ko’alia ho modu korretu kona-ba akompañamentu ema no komunidade nian”. Oinsá animadora, nune’e mós irmán ida bele akompaña ema seluk se nia rasik la halo esperiénsia hetan akompañamentu ida ne’ebé sólidu?

 

Atu habiit kapasidade ba animadora foun sira maka loron hirak ne’e ir Evangelina Xavier no ir Maria Fe Silva halibur hamutuk ho provinsiál, ir Paola Battagliola iha Dili, ba sira nia formasaun nu’udar animadora komunidade nian. Ir Evangelina simu fiar atu sai animadora ba komunidade Laura Vicuña, Laga no ir Maria Fe (hahú ona iha fulan Agostu nia rohan) knaar animadora nian iha komunidade Teresa d’Avila, Baucau. Tuir oráriu, sira nia enkontru hahú loron 3 Setembru no sei remata loron 7 fulan hanesan.

Objetivu: hakle’an no fahe esperiénsia animasaun no governu nian tuir estilu salezianu. Tema sira ba enkontru formativu loron hirak ne’e nian maka: 1) serví no anima ho ahi iha fuan; 2) serví no anima ho liafuan iha ibun; 3) serví no anima ho profesia iha matan.

Ita hatene katak sai animadora komunidade ida nian maka responsabilidade boot, maibé la depende de’it ba irmán responsavel. Iha animasaun ho estilu koordenasaun ba komuñaun fó priviléjiu liu ba relasaun no envolvimentu sirkulár, nune’e, irmán ida-idak sai korresponsavel, tau nia rekursu hotu iha komuñaun atu bele serví “di’ak liután” Maromak no foin-sa’e sira.

Enkuantu ita agradese ba Insitutu nia atensaun ba formasaun irmán animadora nian no mós irmán ida-idak nian, ita mós akompaña ita-nia irmán Evangelina no irmán Maria Fe ho orasaun.