VENERASAUN BA IMAKULADA

‘Piazza di Spagna’ – Roma

8 Dezembru 2022

PAPA FRANCISCO NIA ORASAUN

 

Ami Inan Imakulada,
ohin povu romanu halibur hadulas ita.
Ai-funan sira hatur ita ita ain
husi realidade oioin sidade nian
esprime domin no devosaun ba ita,
ne’ebé tau matan mai ami hotu.
No ita ne’ebé haree no mós simu
ai-funan invizivel sira katak invokasaun barabarak,
hamulak iha nonok uain, dalaruma hanehan hela,
haksumik maibé la’ós ba ita, ita be Inan.

Liutiha tinan rua iha-ne’ebé ha’u mai
atu halo omenajen mesamesak ba ita bainhira hahú loromatan,
ohin ha’u fikahikas ba ita ho ema sira,
ema Kreda ne’e nian, ema Sidade ne’e nian.
No ha’u lori ba ita agradesiemntu no hamukak sira
husi ita-nia oan sira, besik no dook.

Ita, husi Lalehan iha-e’ebé Maromak simu ita,
haree si’ak liu ami sasán sira rai nian;
maibé nu’udar Inan rona bá ami-nia invokasaun sira
atu aprezenta ba ita Oan,
ba nia futar Fuan nakonu ho mizerikórdia.

Uluknanai ha’u lori ba ita domin oan nian
husi mane no feto sura-laek, la’ós de’it ema sarani nian,
ne’ebé iha gratiduan boot liu ba ita
ba ita-nia fafurak nakonu ho grasa no haraik-an:
basá iha kalohan nakukun maka’as nia leet
ita mak sinál esperansa no konsolasaun nian.

Ha’u lori ba ita labarik sira-nia hamnasa,
ne’ebé aprende ita naran iha ita-nia ilas ida nia oin,
iha inan no avó-feto sira-nia liman,
no hahú hatene
katak sira iha mós Inan ida iha Lalehan.
No bainhira, iha moris, akontese katak hamnasa sira-ne’e
husik fatin ba matan-been sira,
oinsá importante tebes koñese ita,
soi nu’udar don ita-nia maternidade!

Ha’u lori ba ita gratidaun husi katuas-ferik no idozu sira:
agradesimentu ida ne’ebé sai ida de’it ho sira-nia moris,
soru ho lembransa sira, ksolok no terus sira,
ho meta sira ne’ebé sira hatene didi’ak
bele to’o ho ita-nia tulun,
ho sira liman kaer ita-nian.

Inan, ha’u lori família sira-nia preokupasaun sira,
aman no inan sira-nian ne’ebé dala barak luta
atu to’o ba nesesidade sira uma nian,
no enfrenta loron ba loron
dezafiu ki’ik no boot sira atu bá oin.
Ho modu partikulár ha’u konfia ba ita kazál foin-sa’e sira,
atu hodi hateke ba ita no ba Sun José
sira bá hasoru moris ho aten-barani
hodi konfia iha Maromak nia Providénsia.

Ha’u lori ba ita foin-sa’e sira-nia mehi no ansiedade sira,
nakloke ba futuru maibé hapara tiha husi kultura ida
rika iha sasán sira no kiak iha valór sira,
nakonu ho informasaun no kuran iha edukasaun,
perzuazivu iha bobar-lia no sadia-laek iha harahun.
Ha’u hameno ba ita liuliu labarik sira
ne’ebé sofre liu Pandemia nia konsekuénsia sira,
atu neineik-neineik sira bele rekupera hikas
atu book an no loke sira-nia liras
no hetan filafali hakaran atu semo aas.

Virjen Imakulada, ohin ha’u hakarak
lori povu ukrainu nia agradesimentu,
ba dame ne’ebé kleur ona ami husu ba Na’i.
Maibé ha’u tenke aprezenta nafatin hamulak
husi labarik sira, husi katuas-ferik sira,
husi aman no inan sira, husi foin-sa’e sira
husi rai ne’ebé hetan tortura, ne’ebé sofre maka’as.
Maibé iha realidade ami hotu hatene
katak ita nafatin ho sira no ho sira hotu ne’ebé sofre,
nu’udar ita hamriik iha ita Oan nia krús sorin.

Obrigada, ami-nia Inan!
Hodi hateke ba ita, ne’ebé la iha salan,
ami bele kontinua fiar no hein
atu domin manán ódiu,
lia-loos manán lia-bosok,
perdaun manán ofensa
dame man’an funu. Amén!