Dili – Ohin, 7 Dezembru 2022, nakonu ho Ksolok no gratidaun Saserdote na’in 4 no Relijiozu/a lubuk ida husi kongregasaun oioin selebra sira nia Jubileu “bodas de ouro” no “bodas de prata” iha Katedrál Dili, sira hamutuk nain 24. Nailulik no Relijiozu/a sira ida-idak selebra ona festa gratidaun ba sira-nia vokasaun atu tuir Kristu besik liután iha sira ida-idak nia kongregasaun. Ohin nu’udar Arkidioseze selebra hamutuk. Selebrasaun Eukarístika prezide husi Pe. Luis Bonaparte no Konsebrante lubuk  ida.

Omilia iha Selebrasaun ne’e, Pe. Mateus Afonso, mak hato’o. Iha omilia Padre ko’alia kona-ba pontu 3: Vida, Vokasaun no Domin. Vida mak grasa ida ne’ebé bo’ot liu ne’ebé kriatura simu. Buat hotu-hotu Maromak mak Kria tanba Maromak mak nain. Haree ba moris ita mak kriatura ida ne’ebé a’as liu kriatura sira seluk ne’ebé tuir siénsia dehan ema mós animál maibé ema mak animál ne’ebé iha hanoin ne’ebé mai husi ezisténsia ida no iha nia finalidade. Tuir mai ita haree ba vokasaun mak grasa ne’ebé hanesan Mistériu. Ohin ita selebra jubileu vida konsagrada, ita tama iha vida ne’e to’o ohin loron tanba buat ne’ebé dudu ita mak Domin. Espresaun domin ne’e ita espresa iha ita-nia moris. Domin ne’e iha ita-nia moris vokasaun halo besik liután ba Maromak. Sabedoria moris nian ne’e iha vida, vokasaun no domin. Ita tuir dalan Maromak nian atu koko sabedoria domin nian. Ita hili buat ida tan domin ita prontu atu simu nia konsékuensia.

Liafuan ruma husi Pe. Adrianus Ola nu’udar reprezentante  jubilante sira. Padre halo komparasaun moris nian ho bee ne’ebé iha tipu oi-oin. Bee merak mak ita nia moris ne’ebé la la’o di’ak, problema sira no nu’udar relijiozu/a la hala’o didi’ak ita nia knaar, ladún iha laran-manas no nia rezultadu mós ladun  di’ak. Bee moos mak halo fuan kmaan. Hanesan ohin ita mós bele mai hodi agradese ba grasa ne’ebé ami simu. Bee nakfilak ba tua ne’e ita mós bele halo, maibé se ita haraik-an no unidade.

Bispu Virgilio Kardeál da Silva nia liafuan ida rua ba Jubilante sira. Amu agradese ba Amululik no Relijiozu/a sira nia saran-an ba Maromak. Ohin loron ksolok ba Arkiioseze Dili nian tanba ita hahi Maromak ba Fidelidade, persevaransa Padre/Madre sira ne’ebé la’o iha dalan ida ne’e nu’udar Reijiozu/a no Saserdote ba tinan 25 no 50 nian laran. Ita haksolok hamutuk tan Grasa Na’i nian ne’ebé ita simu. Igreja Timor riku tebtebes  tanba karizma oioin ne’ebé Nai Maromak haraik mai iha Igreja, partikulár iha Arkidioseze Dili. Agradese Maromak ba kongregasaun sira hotu, ba sira ne’ebé foin too no sira ne’ebé mai kleur ona. Agradese Maromak ba fidelidade no oinsá imi ida-idak ho imi nia estilu da vida hariku kreda. Ita reza atu Maromak kontinua haburas nafatin grasa ida ne’e iha ita nia uma-kreda. Ho vokasaun oioin no karizma oioin lori ita atu sai ida de’it, hala’o misaun iha kreda lokál la’o hamutuk nu’udar kreda ida. Parabéns ba ita-boot sira.

Hafoin Amu Kardeál kontinua hodi agradese ba Amululik ida-idak ba sira nia saran-an no kolaborasaun iha arkidioseze ida ne’e, ba sira nia sakrífisiu, laran-manas ba misaun no kolabora nafatin ho Dioseze.

Depoizde Misa sira hotu ne’ebé partisipa iha Misa hakat hotu ba Salaun Lecidere atu hola bee malirin ruma hafoin fahe malu. Loron ne’ebé nakonu ho gratidaun no ksolok fidelidade no perseveransa nian. Ita reza ba malu atu kontinua unidade, forte no persevera to’o rohan.

(Noemia de Deus FMA)