Roma – Papa Francisco selebra Santa Misa iha domingu, 28, iha okaziaun loron ema katuas-ferik sira-nian, mai husi nasaun barak mundu nian, halo iha Vaticano. Iha omilia nia destaka rikusoin enkontru jerasaun sira-nian, basá husi ne’e bele hetan hanorin sabedouria nian.

Bazeia ba leitura sira Evanjellu nian, Amu-Papa Francisco destaka figura Maria no hanorin ne’ebé nia hetan husi Isabel no Zacarias. Hatene tiha katak Isabel isin-rua, Maria ba vizita atu tulun nian no, liuliu, atu aprende ho nia sabedouria moris nian, Ne’e mak enkontru ida, ne’eb´efundamentál ba futurur povu ida-nian.

“La iha futuru ba povu ida lahó enkontru entre jerasaun sira, se oan sira la simu, ho gratidaun, husi aman-inan sira nia liman, sasin mori snian. No, iha gratidaun ba ida ne’ebé hatutan moris, tama mós gratidaun ba Aman ne’ebé iha lalehan”.

Papa Francisco esplika katak, dalaruma, iha jerasaun joven sira-nian ne’ebé sente nesesidade atu sai autónomu, ‘hodi liberta an” husi liman-rohan ne’ebé jerasaun anteriór husik, buat ne’ebé ita haree hanesan momentu “adolexénsia rebelde”. Maibé se depois se la rekupera enkontru ho jerasaun antiga sira, nia rezultadu mak povu sai kiak no mosu liberdade falsa ida.

Nia fó ezemplu Na’i-Feto nian, ne’ebé hatene rona no rai buat hotu iha nia fuan. Nia hariku ninia espíritu joven ho  Isabel no Zacarias nia sabedouria, espesialisata sira fiar no esperansa nian mai husi Maromak.

“Mundu presiza ida-ne’e, iha tempu hotu. Maria hatene rona inan-aman katuas sira…aprende husi sira-nia sabedouria, ne’ebé sai folin boot liu ba nia, iha ninia dalan feto nian, kabe-na’in nian, inan nian”.

Ne’e mak dalan Maria hatudu mai ita, PAPa Francisco hateten’ enkontru entre joven sira no katuas-ferik sira; ne’ e mak dalan futuru povu ida nian: foin-sa’e sira nia kbiit no katuas-ferik sira nia sabedouria.

Molok Misa remata iha Angelus, Papa Francisco husu atu harohan ba Sínodu estraordináriu Bispu sira-nian kona-ba tema “Dezafiu pastorál sira família nian iha kontestu evanjelizasaun nian”, hahú loron 6 to’o 19 Outubru 2014.