Soibada – Iha loron 25-30 Novembru mak loron hirak ne’ebé estudante finalista husi Instituto São João de Brito Kasait (ISJB) halao sira nia “Programa Aprende Servisu” ho komunidade Posto Administrativo Soibada-Manatuto ho tema “Walking With Ignatius or Walking With People To Discern And Be Convented”. Iha atividade lubuk ida ne’ebé halao durante loron hirak ne’e mak hanesan: Seminario kona ba esperiensia halao misaun iha Soibada nomos Fiar no Kultura. Entre Estudante Finalista sira ne’e iha Irmán FMA ida ne’ebé halao mos nia estudu durante tinan 4 iha fatin refere.

Service Learning Program (SLP) hanesan atividade ida ne’ebé mak realiza husi Eskola Companhia de Jesus (Jezuita) sira nian iha mundu no Instituto São João de Brito (ISJB) integra mos SLP hanesan materia ida iha nia kuríkulum. SLP ho nia objetivu jeral ida atu fo oportunidade ba estudante sira ne’ebé mak iha tinan ikus molok termina sira nia estudu, hodi experiensia direita iha sosiedade kona ba moris komunidade nian, liu-liu iha área rurál sira, hodi sente no reflete hamutuk kona ba, teoria sira ne’ebé mak sira rasik hetan ona iha prosesu estudu no hatudu liu husi pratika morisreal iha sociedade ne’ebé sira sei hasoru iha  moris tomak. Nune’e durante loron hirak nia laran ami haksolok tebes hodi halao atividade sira ne’ebé komisaun prepara ona. Ami rona esperiensia misaun iha Soibada nian hanesan husi Madre superiora Dominicana nian iha Soibada fahe kona ba oinsa Misaun Dominicana nian tama iha rai Soibada iha tempo uluk no agora. Iha tempo uluk hahu ho Madre Dominicana Timor Oan nain rua ne’ebé nakonu ho carajen no domin ba Kreda no Nasaun hakarak eduka menina sira no ohin loron Madre Dominicana sirahakarak hamoris fali espritu ne’e tuir sira nia kontestu ohin loron nian hodi hahu loke fali Pre-Escolar Domincana Soibada. Nakonu ho dezafio oi-oin no selu ho sakrifisiu maibe tamba domin ba Maromak nia reino no hetan suporta husi Bispo sira, sira brani ba oin. Iha mos tempo ituan ba Padre Paroku fahe nia esperiensia misaun nian. Ba nia, misaun ne’ebé nia halao hetan susesu tamba iha kolaborasaun maka’as husi entidade hotu sosidade nian. Partisipasaun husi naiulun sira Kreda no nasaun lokal nian importante los atu lori ba oin misaun komun ida. Oinsa bele hetan ema sira ho hakarak atu kolabora, uluk nanain prezisa sai husi ita nia fatin ba buka sira no rona sira. Hafoin hanoin hamutuk no deside hamutuk. Misaun sei lao ho diak tebes. Iha mos chefe akolitos nian fahe kona ba Istoria esperiensia Nain Feto Aitara nian. Nia koalia buat barak maibe ita hare liu kona ba oinsa nia esperiensia Nain Feto nia protesaun ba nia moris wainhira nia hetan dezastre. Nia temi Nain Feto Aitara dala tolu no nia hetan salvasaun.

Iha ami nia esperiensia ba hela ho familia sira iha suku ida-idak. Entre Suku sira iha Posto Administrativo Soibada nian ami hili 4 hodi ba hela iha Uma kain 3 kada Suku. Esperiensia furak ne’ebé ami halao iha ne’eba mak hare sira nia moris no moris hanesan sira hodi halao ho sira atividade hotu ne’ebé sira halo. atividade sira mak hanesan: halao servisu umalaran, ba to’oshamosbatar du’ut, ba hili ai, ba koa tua no tein tuasabu, hanorin dotrina ba sira ne’ebé atuhalo primeira Komuniaun, reza hamutuk ho sira no lao ba vizita familia iha ne’ebé lao lori oras rua ka tolu. Hodi halo esperiensia sira ne’e halo ami konsiente katak moris ne’e presiza sakrifisiu, esforsu maka’as, domin,honestidade, laran diak no seluk tan. Buat ne’ebé ami deskobre iha familia sira ne’e mak sira nia disponibilidade, hospitalidade, ksolok no domin simu ami no fo fatin no aihan ba ami. Ami agradese tebes ba diak hotu ne’ebé ami simu durante loron hirak ne’e. Atividade hotu ne’ebé ami halao sei taka ho partilha iha grupo ki’ik no aprezenta iha asembleia. Ami mos mantein nafatin Espiritualidade Inaciana hodi fo momentu ikus loron nian ho Ezame Konsiensia iha minutu balun nia laran molok ba deskansa.

Ho fuan nakonu ho gratidaun ami agradese ba Instituto São João de Brito (ISJB), agradese ba Tim SLP no Reitor ISJB ne’ebé fo oportunidade no akomapaña ami iha programa ida ne’e. Ami halo esperiensia interesante tebes no esperiensia sira ne’e sai lisaun folin bo’ot tebes ba ami nia moris no futuro. Maromak sei rekompensa diak hotu ne’e. Obrigada.

(Noemia de Deus, FMA)