Editoriál: «FIDELIDADE BA IDENTIDADE MARIANA»

Selebra tinan 150 fundasaun Institutu FMA nian katak selebra Maromak nia fidelidade mai ita ne’ebé nia bolu no ba sira-ne’ebé Nia haruka ita bá. Fidelidade Maromak nian husu ita-nia resposta fidelidade nian. Maibé ita hatene katak ita frajil, no tan ne’e, ita iha Maria, Inan no modelu ema konsagrada nian.

Iha ezortasaun Vita consecrata, Amu-Papa husu atu iha relasaun fiél ho Maria, Inan no Mestra, fidelidade fundamentál no nesesária atu konserva no dezenvolve sentidu auténtiku konsagrasaun rasik nian, misaun nian no determinante sira seluk vida espirituál nian: Maria nia prezensa iha “importánsia fundamentál ba vida espirituál ema konsagrada ida-idak nian, nune’e mós ba ninia konsisténsia, unidade no progresu komunidade tomak nian” (VC 28).

Madre Chiara iha ninia lia-menon ba Solenidade Santu sira-nian, husu atu halo dalan santidade hodi sai fiél ba ita-nia identidade, hanesan artigu 4 Konstituisaun nian ne’ebé husu atu ita “sai hanesan Nia tulun-na’in, liuliu iha foin-sa’e feto no mane sira leet”. Sai tulun-na’in signifika moris dimensaun tulun nian hanesan Maria moris. Dimensaun tulun nian liu husi dosilidade ba bolun. Maria aseita Maromak nia bolun, simu iha fiar, partisipa, kolabora ho Nia iha mundu nia salvasaun.

Ne’e duni, tuir Madre Chiara nia konvite, mai ita “verifika iha Na’i nia oin, oinsá ha’u asume ha’u-nia identidade ‘Figlia di Maria Ausiliatrice’ nian ne’ebé mai ha’u, mak uluknanai, identidade mariana, misionária”.

(JG)