Dili – Escola Maria Auxiliadora ohin, 21 Novembru 2022, realiza graduasaun ba estudante Pré-eskolár sira hamutuk labarik na’in 89. Feto na’in 48 no mane na’in 41.

Festa graduasaun hahú ho simu bainaka importante sira hanesan Provinsiál FMA TIN, Ir Alma Castagan FMA no Señór Carlito da Silva, Diretór Edukasaun Munisípiu Dili nian.

Graduasaun nia lala’ok hahú ho marxa, iha-ne’ebé formandu sira lori bandeira RDTL to’o iha gymn atu hahú seremónia. Tuirmai iha orasaun, hananu inu nasionál “Pátri”, diskursu sira husi bainaka espesiál na’in rua, diretora eskola, inan-aman no enkarregada komisaun festa nian. Programa tuirmai fahe diploma, agradesimentu ka konvíviu no “snacks”.

Lia-menon husi Ir Alma Castagan, hahú hodi fó hanoin festa ohin nian, katak Na’i-Feto nia inan-aman lori Maria ki’ik-oan ba aprezenta iha Templu atu hahú aprende kona-ba sasán sira Maromak nian. Nune’e mós ho graduadu/a sira ne’ebé inan-aman lori mai eskola Maria Auxiliadora atu aprende no ohin remata ona ain-hakat primeiru katak koñese ona alfabetu no lee, halo konta, hananu, dezeñu nst. Oras-ne’e prontu ona atu bá siklu estudu tuirmai iha ensinu báziku.

Señór Carlito, haktuir katak iha loron hirak ne’e nia bá asiste graduasaun pré-eskolár iha fatin barak iha munisípiu, Nia haksolok mai mós iha eskola Maria Auxiliadora. Nia husu ba labarik sira atu kontinua estuda didi’ak. “Ohin imi hatai faru graduasaun ba dala uluk no imi-nia aman-inan mak seluk imi nia estudu. Estuda didi’ak atu imi hatais tan faru ne’e bainhira imi boot no imi mak selu fali ba imi-nia an raisk no ba imi-nia alin sira”.

Inan-aman sira haksolok tebes ho sira-nia oan nia ézitu no sira rasik mak prepara festa ne’e ba sira-nia oan sira.

(EBC-MA)