Josafat, iha batizmu João Kuntsevytch, moris iha sidade Volodymyr, Ukraina. La iha dokumentasaun data moris loloos miabé moris entre tinan 1579 ka 1580. Nia aman naran Gabriel no nia inan Marina, no nia família komersiante sereál sira-nian.

Bainhira nia tinan 13 ka 14, nia família haruka João Kuntsevytch ba Vilnius, kapitál Lituánia nian, atu serbisu iha komersiante riku ida no membru governu lituanu, Jacinto Popovytch, noune’e aprende di’ak liután arte komérsiu. Iha Vilnius, sidade kosmopolita husi aspetu relijiozu, moris hamutuk konfisaun relijioza kristán oioin – protestante, katóliku no ortodoksu – João tama iha faze hilin desizivu ba nia moris. Nia husu pergunta importante: ida-ne’ebé mak Kristu nia Igreja loloos? Iha tempu divizaun Igreja nian, ida-ne’ebé mak nia tenke tuir?

Hodi Jezuita sira-nia tulun, nia depoizde orasaun no dixernimentu, nia konverte ba katolisizmu.

Nia moris iha períodu difisil Uniaun Brest nian (1596), bainhira bispu Metropóle Ortodoksa Kyiv nian proklama unidade ho Kreda Roma nian maski mantein ritu bizantinu. Tanba la’ós katak hotu-hotu iha hanoin hanesna, nune’e mosu tensaun no konflitu sira.

Husi eremita ba “Apóstolu Unidade nian”

Iha 1604 João tama Orde Saun Basílio nian, iha mosteiru Santíssima Trindade nian iha Vilnus, hodu asume naran Josafat. Josafat hakle’an estudu Padre sira Igreja nian, no nia nakonu ho maravilla, basá sira sai depozitáriu lia-loos nian, no ninia konviksaun sai forte liután. Nia haree katak Padre Igreja Oriente nia hanoin la afeta unidade Igreja Katólika nian, define nu’udar universál, basá iha beleza espirituál auténtika. Ne’e duni, iha Igreja ida de’it, bibi-luhan ida de’it, iha-ne’ebé bibi sira halibur, no Bibi-Atan ida de’it, Amu-Papa, ne’ebé sai Kristu nia Vigáriu iha rai. Iha 1609 nia simu ordenasaun ba amlulik, no ema hotu admira ninia kapasidade ko’alia ba públiku, ninia pregasaun sira. Ho fama ne’e nia hetan nomeasaun ba koajutór bispu Polotzk nian, no tuirmai troka nia.

Bispu Josafat

Josafat enkarna ilas “bibi-atan di’ak nian:: bibi-atan ne’ebé hatene nia bibi sira, bá buka sira ne’ebé la’o lakon dalan, defende sira husi asu-fuik, no ikusmai, saran nia moris ba sira.

Tanba ninia laran-manas no asaun pastorál, ninia inimigu ortodoksu sira hanaran nia “na’ok-teen klamar sira-nian:, Sira akuza nia na’ok klamar husi igreja ortodoksa no dada sira ba igreja katólika.

Bainhira nia kaer dioseze, Josafat põehalo serbisu maka’as ba Igreja nia restaurasaun materiál no espirituál. Husi reforma fízika to’o, katekeze, eskola parokiál, renovasaun sakramentál no litúrjika, ho objetivu atu hasae nivelr elijiozu no kuturál povu nian. Nia mós promove kleru nia renovasaun. Josafat rasik hakerek Regra ba amlulik sira no katesizmu ida ba povu.

Maibé obra no misaun boot liu Josafat nian iha planu pastorál mak ninia pregasaun no asaun ba Igreja nia unidade.

Martíriu

Ninia empeñu pastorál hamosu inveja no laran-moras husi ninia inimigu sira ne’ebé lakohi uniaun ho Bispu Roma nian. Bainhira Josafat halo vizita pastorál ba Vitebs inimigu sira hale’u nia no ho hakilar invade rezidénsia oho ema hotu sira hasoru no ho baliu no pistola oho Bispu Josafat Kuntsevytch, iha loron 12 Novembru 1623. Sira soe nia isin ba mota Dzwina. Liutiha loron lima mak hetan fali nia isin mate. Josafat iha de’it tinan 46 no tinan neen depoizde ordenasaun episkopál.

Fini ne’ebé fó fuan

Ninia aten-barani atu enfrenta mate hamosu admirasaun maka’as no até ohodór sira-nia arrependimentu, hodi konverte an. Milagre barak atribui ba Saun Josafat ninia intersesaun. Iha 16 Maiu 1643 Papa Urbano VIII proklama nia Beatu, Depoizde sékulu rua, iha 29 Juñu 1867, iha sentenáriu da-18 martíriu S. Pedro no S. Paulo nian, Papa Pio IX kanoniza Josafat.

Família relijioza Saun Basílio nian mak rai nia restu mortál sira, no iha 1916 lori ba Áustria no hakoi iha igreja Santa Bárbara iha Vienna. Ikusmai, depoizde funu mundiál II, lori bá Roma, no hodi Papa S. João XXIII nia hakaran, ninia restu mortál hakmaan an iha Bazílika Saun Pedro nian, iha altár S. Basilio Magno nia okos.

Saun Josafat mak apóstolu unidade Igreja nian, patronu Ukraina no ekumenista sira-nian.