Kada loron 9 Novembru, Kreda España nian selebra “Santa María de la Almudena” ka “Nuestra Señora de la Almudena”, patrona Arkidioseze Madrid nian, ne’ebé nia ilas haksumik istória ida ne’ebé karik ema barak la hatene.

Durante invazaun Muslim sira-nian ba Península Ibérika iha sékulu VIII, sarani sira deside subar ilas Virjen Maria nian iha torre ida husi torre sira muru nian ne’ebé hale’u kapitál España nian. Sira tau iha-ne’ebá atu proteje estátua ne’e, basá durante tempu invazaun, Muslim sira elimina sinál hotu Katolisizmu nian ne’ebé sira hetan.

Liutiha tinan barak, Españól sira buka atu rekupera fali estátua, maibé lahó susesu, tanba sira la konsege identifika fatin loloos iha-neebé sira subar Na’i-Feto iha muru laran.

Tanba situasaun ne’e, Liurai Alfonso VI deside halo prosisaun ida hale’u muru atu fó onra ba Na’i-Feto, halo iha loron 9 Novembru 1085.

Enkuantu sarani sira halo prosisaun hale’u muru Madrid nian, parte muru ida torre sira-nian monu. Iha muru ne’ebé monu nia rahun mosu ilas Viirjen Maria nian ho lilin rua ne’ebé lakan.

Husi momentu ne’e, ilas ne’e simu naran “Virgen de la Almudena”, iha lia-árabu “al-mudayna” signifika “sidade ki’ik-oan” ka “kompleksu militár ho muru hale’u”. Ho títulu ne’e, iha tinan 1908, mak foti nu’udar padroeira sidade Madrid nian.

Iha foho-oan ne’ebé sarani sira hetan estátua “Virgen de la Almudena” nian, ikusmai, harii tiha katedrál ida atu onra nia, símbolu povu Madrid nia fiar nian. Tinan-tinan turista rihun ba rihun vizita fatin ne’e.

Ilas Na’i-Feto Almudena nian hetan koroasaun kanónika iha 10 Novembru 1948 no Papa S. Paulo VI deklara nu’udar padroeira Madrid nian iha 1977.