Baucau – Ho fuan gratidaun nian nakonu ho ksolok no domin, ohin loron 6-11-2022 ami komunidade St. Teresa d’Ávila Baucau selebra festa gratidaun nian ho nia tema “agradese, hodi halo buat hotu tan domin”, festa ida ne’e mak momentu signifikativu vida familia nian ho familia Salesiana sira iha ne’ebé atu haburas espiritu familia nian, hanesan DB dehan: fuan ne’ebé hatene agradese mak fuan ne’ebé hatene hadomi, nune’e hahu semana ida antes ami oferese orasaun ba grupu asosiasaun sira ne’ebé inklui iha komunidade nia misaun no loron 5-11-2022 ami agradese liu husi orasaun Rosario espesial no ohin selebra Eukaristia hamutuk nu’udar familia salesiana hodi agradese ba malu ba pastoral tomak ne’ebé hala’o durante tinan ida ne’e.

Maibé ohin agradese ho modu espesial ba Irmán Sanzinha, ba ninia dedikasaun, pasensia no domin hodi hala’o nia kna’ar nu’udar diretora durante tinan hirak ne’e iha komunidade ida ne’e. Selebrasaun Eukaristia prezide husi Amu Pároku pe. Manuel Ximenes,(SDB) no iha nia homilia haktuir katak iha Antigu Testamentu liurai hakarak estraga sira nia isin no oho sira maibé sira pronto atu mate tanba sira iha prinsipiu fiar nian forte hodi hakarak saran sira nia an ba mate tanba atu defende buat ne’ebé loos no sira fiar katak sira sei simu isin kompletu iha Lalehan. Hanesan Evanjellu ko’alia konaba moris hias katak bainhira iha espiritu ne’ebé kualidade, loron ida ita nia klamar sei moris maibé se espiritu la iha kualidade ita nia klamar sei dodok hamutuk ho isin, hanesan batar ne’ebé ita kuda balun moris balun lae. Nune’e mos agradese ba ir. Sanzina ne’ebé husik buat hotu hodi hetan fali iha familia foun no familia boot ne’ebé nia hasoru iha nia misaun Salesianaa tanba nia Fiar iha Maromak.

Depois de misa iha liafuan agradesementu husi reprezentante Antiga aluna mana Ágata, Oratorianu nian; animador Naterçia no ADMA nian dona Esperança, sira agradese ba madre nia dedikasaun no domin hodi serbisu hamutuk ho sira. Tempu hanesan Ir. Sanzinha mos espresa nia gratidaun ba grupu familia boot Salesiana nian, ne’ebé serbisu hamutuk iha misaun komunidade FMA Baucau nian, madre mós dehan; bainhira ita la’o iha koridor Salesiana nian ita mak familia boot Salesiana nian ne’ebé nafatin espresa ninia ksolok familia nian. Hafoin kontinua fahe ksolok ba malu hodi hametin liu tan ami relasaun familia nian liu husi konfraternizasaun.

(FMA Baucau)