Venilale – Iha loron 5 Novembru, eskola ETV Mazzarello Venilale partisipa formasaun kona-ba oinsa prepara CV – Curriculum Vitae ba vaga serbisu nian. Formasaun ida ne’e fó husi Sr. Helder Machado da Rosa,agora dadaun nu’udar chefe iha Restaurante Aroma. Chefe Helder esperiénsia katak joven barak la hetan oportunidade iha fatin serbisu tanba la hatene prepara CV ho didiak no la fó atensaun ba Boa maneira sira ne’ebé presiza tebes iha fatin serbisu.

Iha dader grupu Tékniku Hotelaria husi klase 1- 3, partisipa palestra ne’ebé koalia konaba Oinsa prepara CV ba vaga serbisu nian. Prepara CV ho informasaun kompletu konaba ita-nia identidade no ita-nia esperiénsia serbisu iha tempu prezente ho lolos no ho onestu. Hafoin mensiona mos kona ba atitude, komportamentu no aparensia ema ida nian bainhira ba hasoru intrevistadór sira. Nune’e mós fó koñesimentu ba estudante sira kona pontu 5 pilar importante iha restaurante ida nian bainhira ita serbisu iha restaurante ida.

1. Lokalizasaun
2. Ambiente
3. Atendimento
4. Hahán ( Aroma no Aprezentasaun)
5. Sabor

Palestra ne’e ho simulasaun ho estudante sira konaba oinsa hatan ho ema ne’ebé fo entrevista no oinsa atendimentu iha restaurante.

Grupu Tékniku Alimentar aprende halo Bolu de Maçã no Bolu de cenoura hamutuk ho Sra. Sandra Mara Machado Chefe Helder nia mama. Iha loraik, halo rotasaun ba klase sira neʼebé seidauk simu informasaun.

Agradese wain ba Chefe Helder ho nia mama Sra. Sandra ne’ebé fó formasaun ne’e ho gratuita. Agradese ba Chefe Helder ne’ebé iha hakarak boot atu tulun joven Timor Oan atu hetan oportunidade iha fatin serbisu.

(Alice Filipe)