Durante enkontru ho foin-sa’e sira iha “Sacred Heart School”  iha Awali, Papa Francisco dehan ba sira, “Ami presiza imi-nia kriatividade, imi-nia mehi sira no imi-nia aten-barani, imi-nia simpatia no hamnasa sira, imi-nia ksoloko ne’ebé hadaet no mós buat uitoan imi-nia turbulénsia nian ne’ebé imi lori ba situasaun ida-idak, ne’ebé tulun ita atu sai husi situasaun dukur iha toman no modu sira atu hateke ba sasán sira”.

Papa Francisco enkoraja foin-sa’e sira atu “Keta lakon korajen atu iha mehi boot no moris moris nakonu”, durante enkontru ho foin-sa’e sira iha “Sacred Heart School” iha Awali, Bahrain iha sábadu 5 Novembru 2022.

Hodi foti indikasaun husi foin-sa’e na’in tolu nia sasin sira ne’ebé sira hato’o molok eventu, Papa Francisco oferese “konvite ki’ik-oan tolu”, hodi insiste katak nia la ko’alia nu’udar mestre ida, maibé liuliu atu “enkoraja imi“

Hakohak kultura tau-matan ka kuidadu nian

Tau matan signifika dezenvolve atitude interiór empatia nian, hateken atentu ne’ebé lori ita sai husi an rasik, prezensa delikada ida ne’ebé manán indiferensa no dudu ita atu iha interese ba ema seluk. Kultura kuidadu nian, Amu-Papa hateten, bele sai “pontu virajen ida” ka “antídotu” ba mundu modernu ne’ebé dalabarak taka an.

Papa Francisco hatutan katak atu tau matan ba ema seluk, “ezije treinu konstante” no tenke hahú husi an rasik, tau matan ba an rasik, “liuliu iha interiór”, fatin ne’ebé haksumik liu, klamar, fuan:

«Imi-nia klamar, imi-nia fuan! Buka rona Nia iha silénsiu, kria espasu sira atu horik iha kontaktu ho imi-nia interioridade, atu sente imi-nia nu’udar don, atu simu imi-nia ezisténsia no la husik nia halai husi imi-nia liman».

No atu la sai “turista moris nian” buka tau matan, iha silénsiu “rona movimentu sira fuan nian, ko’alia ho Maromak”, ko’alia ba Maromak mós kona-ba ema sira “ne’ebé imi hasoru loroloron no Nia fó ba imi nu’udar maluk viajen nian”.

Kuda fraternidade

“Se ita hakohak, ita kontribui atu halo sai boot fini fraternidade nian, Amu-Papa kontinua, “no ida- ne’e ha’u-nia konvite daruak, kuda fraternidade”.

Hodi foti espresaun husi Adulla nia sasin katak «Presiza kampeaun la’ós de’it iha jogu kampu nian, maibé mós iha vida», Papa Francisco konvida atu sai kampeaun fraternidade nian. Hodi halo nune’e, foin-sa’e sira sei sai “hari-na’in futuru nian, basá iha fraternidade de’it mak ita-nia mundu iha futuru”.

Hafoin, bazeia ba Nevin nia sasin, Papa Francisco enkoraja foin-sa’e sira atu harii relasaun, liuliu relasaun ho Maromak, ne’ebé bele halo sai fasil atu haree Maromak iha ema seluk.

Aseita dezafiu atu halo desizaun sira

Ikusliu, Papa Francisco husu foin-sa’e sira atu “aseita dezafiu sira atu halo desizaun sira iha moris”. Halo desizaun diak, nia ahteten, envolve aprendizajen atu tetu opsaun sira no hili dalan ne’ebé loos.

Hatán ba pergunta sira ne’ebé Merina halo, Amu-Papa enkoraja foin-sa’e sira atu “bá oin lahó ta’uk, maibé nunka bá mesak”. Maromak nafatin ho ita, Papa Francisco dehan hodi hanoin fali Merina nia liafuan sira ne’ebé dehan katak ita bele aprende atu distinge Maromak nia lian “liuhusi orasaun iha silénsiu no diálogu íntimu ho Nia”.

Papa Francisco mós enkoraja atu foin-sa’e sira buka “konselleiru di’ak”, matenek no bele konfia, molok buka konsellu husi Internet. Entre konselleiru sira Amu-Papa hanoin kona-ba “inan-aman sira no professor/a sira, maibé mós idozu sira, avó sira” no “akompañadór espirituál di’ak ida”.  Ita hotu, “presiza akompañamentu iha dalan moris nian”, Amu-Papa subliña.

“Nunka lakon esperansa no korajen atu iha mehi boot”

Atu remata nninia liafuan sira, Papa Francisco dehan ba foin-sa’e sira ho modu enfátiku, “Ami presiza imi-nia kriatividade, imi-nia mehi sira no imi-nia aten-barani, imi-nia simpatia no hamnasa sira, imi-nia ksoloko ne’ebé hadaet no mós buat uitoan imi-nia turbulénsia nian ne’ebé imi lori ba situasaun ida-idak, ne’ebé tulun ita atu sai husi situasaun dukur iha toman no modu sira atu hateke ba sasán sira”.

No nia garante sira, “Igreja hamutuk ho imi no presiza imi ida-idak, atu bele sai foun, esplora dalan foun sira, esperimenta linguajen foun sira, sai haksolok liután no maksimun”.

Hodi habadak nia mensajen ba foin-sa’e sira, Amu-Papa enkoraja sira atu “nunka lakon korajen atu mehi no morisiha sasukat boot! Halo kultura tau-matan nian sai im-nian no habelar nia; imi buka sai kampeaun fraternidade nian; enfrenta dezafiu sira moris nian hodi husik atu Maromak nia kriatividade fiél no konselleiru di’ak sira orienta imi”.