Madre Chiara Cazzuola nia mensajen

Iha okaziaun momentu orasaun online Holy Ween – 30 Outubru 2022

 

Irmán doben sira,

ha’u simu pedidu atu ho imi konsentra iha sentidu signifikadu santidade nian. Saida mak santidade mai ha’u, “Figlia di Maria Ausiliatrice”, saida mak santidade iha ita-nia Institutu, konsiste iha saida loos? Ha’u hanoin katak uluknanai santidade ne’ebé ita simu bolun mak santidade ordinária ida. Ida ne’e ita foti konkluzaun hodi haree hikas obra nia hahú, iha Don Bosco no mós Madre Mazzarello nia vokasaun. Ba Don Bosco, ba Valdocco, santidade hola parte ba uma. Maibé iha Mornese mós moris santidade iha atitude loron ba loron, normál: santidade ordinária ne’ebé kona ema hotu nia moris, iha-ne’ebé hotu-hotu simu bolun. Santidade ida tuir sasukat ema nian, umana.

Estréia tinan ne’e nian lori ita atu hakle’an argumentu ida-ne’e, tanba ita haree katak ba S. Francisco de Sales iha tebes duni mediasaun ida-ne’e: tranzmite konseitu santidade, ne’ebé iha Kreda tempu ne’ebá nian haree nu’udar buat ruma aristokrátiku, nobre, ba espíritu balun de’it, ho S. Francisco de Sales fali deskobre hikasfali nu’udar elementu fundamentál iha vida sarani.

Nune’e ba Madre Mazzarello santidade mak kuaze ánsia ida – ánsia pozitiva klaramente – maibé bainhira nia hakerek ba Irmán sira, dalabarak nia subliña vokasaun ba santidade ida-ne’e: moris loron ba loron ho aten-barani, basá ita tenke sai santa no rika iha meresimentu barak, tanba moris liu lalais, tanba ita-nia moris la naruk, dura kleur , no iha Mornese ida-ne’e mak esperiénsia loroloron nian.

Nune’e, koneksaun ba eternidade ida-ne’e, ba Madre Mazzarello mak modu atu leno moris ordinária; ne’e duni, moris ordinária iha prolungamentu iha pensamentu eternidade nian. Maibé  liuliu santidade mak moris iha Maromak nia prezensa, sente Nia horik iha ita no ita horik iha Nia, no tanba ne’e ita-nia atividade loroloron nian nakonu ho sentidu Maromak nian. Moris ho Nia, halo ho Nia no ba Nia.

Bainhira ita hanoin Madre Mazzarello, ita iha risku atu hanoin nia aas liu. Natón de’it atu lee Surat ruma. Bainhira nia ko’alia kona-ba luta interiór, defeitu sira-nian – porezemplu nia dehan: “Ita lakohi oan-feto sira lahó defeitu, maibé la badame malu ho defeit sira” – nia rasik konsola Irmán sira ne’ebé susar liu hodi dehan: “Harre bá, ha’u mós hatene ida-ne’e katak sá”. Nia tau an ih an iha nivel umanu, hodi fó ninia komprensaun ba ida ne’ebé susar atu halo dalan santidade nian. Santidade ida ne’ebé liu husi atividade loroloron nian, ne’ebé sintetiza vida fraterna, orasaun, ho misaun. Sintetiza relasaun ho Maromak ho relasaun ho ema seluk, relasaun komunitária, relasaun edukattiva, ho foin-sa’e sira, labarik sira ne’ebé entrega mai ita.

Santidade ida ne’ebé sai empeñu prioritáriu iha ita-nia moris: Amu-Papa sira nia intervensaun sira mós dalabarak fó hanoin kona-ba ida-ne’e – ita ko’alia ona iha Sirkulár ida (n° 1019) – maibé natón de’it lee Apéndise sira ita-nia Konstituisaun nian atu hetan fali referénsia sira-ne’e. Ha’u temi Saun Paulo VI, Saun João Paulo II: sira na’in rua hotu dehan mai ita katak tebes duni empeñu ita-nia moris no ita-nia misaun nian bele lori bá oin iha santidade de’it. Santidade mak halo sai fekunda ita-nia asaun edukativa: santidade ida, ha’u dehan, normál.

Ita hetan inspirasaun husi sé? Ita iha karizma ida furak liu ne’ebé moris husi Maria nia fuan, Espíritu Santu mak hamosu, maibé liuhusi Maria, no fuan marianu ida-ne’e tama iha ita-nia identidade. Ho sé mak ita bele sukat atu hatene se ita-nia santidade reál, auténtika, se la’ós ho Maria?

Iha artigu 4 ita hetan sínteze furak liu. Katak sá asume identidade mariana. Parágrafu ikus dehan: “sai hanesan Nia tulun-na’in, liuliu iha foin-sa’e feto no mane sira leet”. Sai tulun-na’in signifika moris dimensaun tulun nian hanesan Maria moris. Dimensaun tulun nian liu husi dosilidade ba bolun. Maria aseita Maromak nia bolun, simu iha fiar, partisipa, kolabora ho Nia iha mundu nia salvasaun no fó hikasfali modelu ida ne’ebé ita foti ho kór partikulár ida iha dalan pré-kapitulár, kapitulár no mós pós-kapitulár. Ne’e mak pasajen Festa Kaná nian, ne’ebé korrepsonde ho festa litúrjika Maria Auxiliadora nian.

Iha pasajen ne’e – ne’ebé ita hakle’an maka’as, ita ko’alia maka’as, ita trata maka’as, iha ita-nia orasaun, iha ita-nia konversasaun sira, iha serbisu oré-kapitulár sira, iha asembleia kapitulár, leno dalan pós-kapitulár tomak – Maria iha Kaná, prezensa saida loos mak ne’e? Ne’e mak prezensa inan nian, prezensa edukativa, “asistente saleziana” loloos ida, tanba – deskulpa ba lisensa ida-ne’e – nia nota, Maria haree, ninia hateken hakat liu festa.

Ema ida la nota buat ne’ebé akontese daudaun, parese Jezús mós lae, tuir Evanjellu João nian. Maibé Maria haree, nia nota no intervein, hodi bá hasoru Jezús no dehan ba Nia ho desizaun: “sira nia tua la iha ona!” Nia la hein resposta. Loloos, tuir Evanjellu, Jezús nia resposta parese maka’as – “Ha’u iha saida ho idaa-ne’e, feto?” – maibé, konserteza, Jezús lakohi falta respeitu ba nia inan. Nia hakarak fó hanoin de’it katak “nia oras” seidauk to’o. Maria la sai lahakmatek, la lakon dame. Nia bá hasoru atan sira no dehan: “Imi halo tuir buat ne’ebé Nia haruka”.

Maria segura katak Jezús sei intervein, nia iha fiar. Ita simu bolun atu moris tipu preznesa ida-ne’e – ne’ebé rona, ne’ebé haree, ne’ebé intervein, ne’ebé previne, ne’ebé iha fiar – ne’e duni diskursu misaun nian mai ita mak buat ida de’it ho ita-nia moris no marka modu hatán nian ba bolun santidade nian.

Ne’e duni sai tulun-na’in, liuliu iha doin-sa’e feto no mane sira leet, maibé la’ós de’it, ba komunidade mós, ba ema sira ne’ebé ita hasoru mós, iha kontestu sira ita moris bá – sira ne’ebé fasil no difisil sira, ne’ebé funu, pobreza no kontradisaun barabarak hasusar – ita simu bolun iha kontestu sira-ne’e atiu moris sai tulun-na’in, ne’ebé mai ita mak sínteze aas liu. Ita-nia moris santidade nian nu’udar “Figlie di Maria Ausiliatrice” mak substansialmente ida-ne’e: sai tulun-na’in, ne’ebé signifika asume no moris totalmente iha vida rasik espiritualidade no identidade mariana.

Ha’u fiar katak ida-ne’e sufisiente liu, ha’u husik atu imi halo aprofundimentu sira… Furak liu argumentu identidade mariana nian nu’udar modu moris santidade. Iha artigu 4 no 44 Konstituisaun nian ne’ebé esplika didi’ak ita-nia modu relasiona an ho Maria no konfrontu ho Nia, maibé se ita lee ho atensaun Konstituisaun sira, ita nota Maria nia prezensa atraversa testu ho modu globál, no la’ós de’it artigu rua ne’ebé fó hanoin mai ita kona-ba identidade mariana; iha referénsia barak iha ita-nia Konstituisaun sira.

Ha’u la para iha Don Bosco, maibé natón de’it lee apéndise sira Konstituisaun nian, iha-ne’ebé nia hakerek ba “Figlie di Maria Ausiliatrice”, atu komprende sá loos ninia ideál FMA nian relasiona ho santidade. Ha’u husik mós ba imi serbisu uma nian, basá loos duni, labele dehan buat hotu iha enkontru badak ida.

Imi bele – iha leitura pesoál, iha reflesaun, iha meditasaun mós – foti fali elementu sira-ne’e atu verifika iha Na’i nia oin: ha’u iha ona pontu ida-ne’ebé, oinsá ha’u moris no, di’ak liután, oinsá ha’u asume ha’u-nia identidade “Figlia di Maria Ausiliatrice” nian ne’ebé mai ha’u, mak uluknanai, identidade mariana, misionária.

Ha’u agradese imi ba imi-nia pasiénsia, ha’u kumprimenta imi no dezeja buat di’ak hotu.

 

Madre Chiara Cazzuola