Dili – Domingu Mundiál Misaun nian mak loron ida ne’ebé Kreda Katólika iha mundu tomak dedika atu hafoun ninia empeñu ba movimentu misionáriu, ne’ebé koordena husi Pontífísia Obra Misionária, ne’ebé koñesidu mós ho “Missio”. Loron ne’e baibain selebra iha domingu penúltimu fulan Outubru nian.

Ba tinan 2022, tema Loron Mundiál Misaun nian mak “Imi sei sai ha’u-nia sasin” (Apóst 1,8) no iha selebrasaun tinan ne’e iha sabór partikulár. Iha aniversáriu tolu ne’ebé festeja iha tinan ne’e: tinan 400 fundasaun Kongregasaun Propaganda Fide, tinan 200 Obra Pontifísia Dahuluk, Obra Propagazione della Fede, no tinan 100 bainhira obra sira sai Obra Pontifísia.

Tinan ne’e iha beatifikasaun Pauline Jaricot, ne’ebé harii Obra Propagazione Fidei, obr amisionária dahuluk. Obra ne’e mak propoin ba Amu-Papa Pio XI iha 1926 atu tinan-tinan dedika loron ida ba atividae misionária Kreda universál nian. Amu-Papa simu pedidu ne’e no iha tinan 1926 selebra Loron Mundiál Misionária dahuluk iha domingu penúltimu fulan dedika ba misaun katka fulan Outubru.

Tan ne’e mak osan esmola hotu iha domingu ida-ne’e sei haruka hotu ba Roma atu uza ba obra misionária Kreda universál nian. Eskola Maria Auxiliadora ba tinan barak ona envolve estudante hotu iha apelu hanoin misaun sira. Nune’e, turma ida-idak iha kofre ida iha-ne’ebé loroloron sira tau osan atu oferese ba atividade misionária Kreda nian durante fulan Outubru. Sira-nia osan ne’e sei entrega ba Pontifísia Obra Misionária iha Timor-Leste.

Obra Pontifísia Misionária iha knaar atu fó apoiu finanseiru ba atividade misionária, ne’ebé mai husi ideia beata Pauline Jaricot atu envolve sarani baibain sira iha obra misionária.

Atualmente, Pontifísia Obra Misionária iha haat, hotu-hotu harii iha sékulu XIX: Pontifísia Obra Infánsia Misionária, hariii iha Fransa husi Bispu Charles Forbin-Janson; Pontifísia Obra Propaganda Fidei nian, ne’ebé Pauline Jaricot funda; Obra misionária Saun Pedro Apóstolu nian, moris iha 1889, hetan inspirasaun husi bispu Cousin rai Nagasaki nian, ba amlulik sira-nia formasaun, no Stefanie no Jeanne Bigard tau iha prátika; no ikusnian Pontifísia Uniaun Misionária, asosiasaun ida kleru, relijiozu/a no leigu/a sira-nian, atu hamosu iha Kreda laran-manas ka paixaun ba misaun.

(JG)