Ohin, iha párokia Maria Auxiliadora estudante 6°ano EBC MA mak anima liturjia. Sira dramatiza Evanjellu kona-ba ai-knanoik feto-faluk ne’ebé husu justisa.
Juiz ne’e ema korruptu, ema lahó remorsu, maibé ikusmai, tanba kolen ho feto-faluk ninia insisténsia, nia deside atu halo nia hakaran (kf Lc 18,1-8). No nia hanoin: “Di’ak liu ha’u rezolve problema nune’e hasees nia husi ha’u, no la kontinua mai lamenta iha ha’u-nia oin”. Ai-knanoik ne’e halo ita komprende katak fiar la’ós impulsu momentu ida nian, maibé dispozisaun korajoza atu invoka Maromak, atu “diskute” mós ho Nia, hodi la rezigna an iha buat aat no injustisa nia oin.