Istória aparisaun Na’i-Feto Grasa sira-nian

Iha loron 27 Novembru 1830,iha Paris, novisa husi Kongregasaun S. Vicente de Paulo, Catarina Labouré, tama iha kapela ba orasaun sira, bainhira nia haree vizaun tuirmai ne’e:

“…Señora ida ho estatura média, ho oin furak liu no kmook…. Nia hamriik hela, ho vestidu halo ho hena seda, kór mutin hanesan rai-hun mutin nian. Iha nia ulun iha véu azúl, ne’ebé tun to’o ain…

Nia liman sira lolo ba rai, nakonu ho kadeli sira halo ho fatuk murak. Virjen Santíssima, dehan mai ha’u: ‘Ne’e mak símbolu Grasa sira-nian ne’ebé ha’u hasuli ba ema hotu ne’ebé husu mai hau…’

Nune’e froma tiha haleu Na’i-Feto, kuadu ovál ida, iha ne’ebé lee, ho letra osan-mean nian, liafuan sira ne’e: ‘Oh Maria ko’us lahó salan, harohan mai ami ne’ebé mai husu Ita-Boot nia tulun’ [‘Ó Maria concebida sem pecado, rogai por nós, que recorremos a Vós’].

Hafoin, kuadru ne’ebé ha’u haree fila nia sorin, no ha’u haree iha kuadru kotuk letra “M”, ho krús iha parte leten, ho trasu ida iha nia baze. Iha okos, Jezús no Maria nia futar Fuan Santu. Jezús nia Fuan, ho ai-tarak haleu no ho ahi lakan, no Maria nia Fuan ho ahi lakan mós no ho surik ida sona borus, ho fitun sanulu-resin-rua haleu nia.

Tempu hanesan, ha’u rona momoos Na’i-Feto nia lian ne’ebé dehan: ‘Haruka, haruka ema tuku medalla ida ho tuir modelu ida-ne’e. Ema sira ne’ebé lori nia ho devosaun, sei simu grasa ua’in”.

Ne’e mak revelasaun domin nian husi Virjen Santíssima, promesa ida grasa no milagre sira-nian ne’ebé sei lori konversaun ba ema rihun ba rihun iha mundu no grasa lubuk ida ne’ebé to’o ohin loron sei haraik nafatin. Husi kedas inísiu medalla ne’e nian, iha 1832, iha tempu ne’ebé Europa tomak hetan epidemia kólera nian ba tinan ruma, medalla ne’ebé fahe ba ema barak husi Paris to’o Europa tomak, halo milagre barak, tanba ne’e mak povu hanaran  “medalla milagroza”. Tebes duni, milagre husi Na’i-Feto Grasa nian sura-laek duni!

Aparisaun no Dogma

Na’i-Feto nia aparisaun ida-ne’e profunda liu, basá nia revela ba novisa ki’ik-oan ida Dogma ne’ebé proklama iha Roma, liutiha tinan 24: dogma Imakulada Konseisaun nian.

Hakerek iha medalla: “Oh Maria ko’us lahó salan, harohan mai ami ne’ebé mai husu Ita-Boot nia tulun” [Ó Maria concebida sem pecado, rogai por nós, que recorremos a Vós”], fhalo referénsia ba dogma Imakulada Konseisaun, ne’ebé Papa Pio IX proklama iha 1854.

Loos duni katak sarani sira sempr27e fiar iha lia-loos ida-ne’e husi kedas Kreda nia inísiu, maibé nunka afirma nu’udar dogma no la uza iha hakerek no orasaun sira.

Afirmasaun ida-ne’e sirkula de’it iha teólogu no estudiozu sira Vaticano nia leet, tanba ne’e imposivel katak foin-sa’e novisa ida koñese lia-loos fiar nian ida-ne’e.

Papa Pio IX iha ninia dekretu afirma katak: “Hodi meresimentu sira mai husi Kristu nia paixaun no moris-hi’as no hodi asaun espesiál Maromak nian, Jezús nia Inan livre husi salan orijinál husi kedas nia moris nia hahú, katak, husi momentu nia inan ko’us nia, ne’ebé ita hatene nu’udar Imakulada Konseisaun”.

Medalla Milagroza Na’i-Feto Grasa nian (Nossa Senhora das Graças)

Iha tempu badak, medalla sai famoza. Iha 1832 epidemia forte ida kona Paris no lori ema liu 20.000 ba mate. Iha tempu ne’e, Pe. Aladel, Catarin ania konfesór, haruka tuku Medalla rihun rua, ba Kongregasaun S. Vicente nian.

Irmán sira fahe kedas medalla sira ba povu. Nune’e, akontese kura milagroza, hodi hasai ema husi mate. Tanba ne’e, devosaun habelar lalais. Povu Paris nian hahú hanaran medalla nu’udar “milagroza”. Iha 1876, bainhira Catarina Labouré mate, medalla  liu billaun ida mak ema halo tiha ona iha mundu.

Papa Pio XII, iha tempu ida hakerek: “Medalla piedoza ida-ne’e, husi momentu dahuluk kedas, sai instrumentu ba favór sura-laek, espirituál no temporál, kura ua’in, protesaun, no liuliu konversaun sira-nian, nune’e povu ho lian ida de’it hanaran nia, “Medalla Milagroza”.

Orasaun ba “Nossa Senhora das Graças”

Oh Imakulada Virjen, Maromak nia Inan no ami Inan, hodi kontempla ita-nia liman nakloke sira ne’ebé hasuli grasa sira ne’ebé ami husu, ho konfiansa nakonu iha ita-nia intersesaun kbit-na’in nian, ne’ebé dalabarak hatudu liuhusi Medalla Milagroza, maski rekoñese katak ami la soi, tanba ami nia kulpa sura-laek sira, ami hakbesik ba ita-nia ain atu hato’o,durante orasaun ida-ne’e, ami-nia nesesidade urjente liu (husu grasa ne’ebé hakarak).

Haraik, oh Virjen Medalla Milagroza nian, favór ne’ebé ho laran-metin ami husu ba ita, ba Maromak nia glória boot, no ami-nia klamar sira nia di’ak. No atu ami bele serví di’ak liután Ita nia Oan Divinu, inspira iha ami ódiu profundu ba pekadu no haraik mai ami aten-barani atu afirma ami-nia an nu’udar sarani loloos. Amén.

Reza Ave Maria 3 no jakulatória “Oh Maria Inan Sala-Laek, haraik tulun mai ami ne’ebé husu Ita-Boot nia tulun”.

(JG)