Kapítulu Jerál online

Roma- Ohin 22 Setembru, iha Casa Generalizia FMA nian iha Roma, loke ho modu ofisiál Kapítulu Jerál XXIII “Figlie di Maria Ausiliatrice”, kona-ba tema “Sai ohin ho foin-sa’e sira, uma ne’ebé evanjeliza”.

Partisipa iha serimónia autoridade ekleziál no relijioza sira: Kardeál João Braz de Aviz, Prefeito Kongregasaun ba Institutu Vida Konsagrada no Sosiedade Vida Apostólika nian; Kard. Tarcisio Bertone no Raffaele Farina; Pe. Ángel Fernandez Artime, Reitór-Mor Kongregasaun Saleziana ho ninia vigáriu Pe. Francesco Cereda no Konselleiru seluk, ho salezianu barak seluk; reprezentante husi grupu oioin Família Saleziana nian, foin-sa’e sira, novisa saleziana sira, FMA partisipante ba KJ XXIII no reprezentante FMA hotu Roma no mundu nian.

Loron abertura hahú ho Selebrasaun eukarístika ne’ebé Reitór-Mor Pe. Ángel prezide no konselebra ho Pe. Francesco, Vigáriu jerál no Reitór-Mor nia sekretáriu.

Introdusaun ba Eukaristia evoka “uma”, fatin akollimentu no komuñaun nian, relasaun no partilla fiar nian, fatin iha-ne’ebé moris espíritu família nian. Sentralidade raronak Maromak nia Liafuan nian nia símbolu mak akollimentu no invokasaun naroman no dixernimentu kona-ba MAromak nia mehi ba Institutu.

Iha omilia Reitór-Mor aprezenta ilas tolu foti husi Evanjellu loron nian” naroman, muru nia transparénsia no rikusoin. Ne’e mak estímulu tolu atu sai ih amoris loroloron, ho foin-sa’e sira no ba foin-sa’e sira, harii-na’in uma ida ne’ebé hatene simu, ho odamatan nakloke, ho laran-manas misionáriu no partilla domin no afetu sinseru.

Iha momentu ofertóriu nian, Madre Jerál no Konselleira sira simu apelu atu lolo sira-nialiman iha altár leten iha oferta, sinál katak Institutu tomak prezente iha jestu saran-an ne’e nian, ho rikusoin diversidade no universalidade nian. Durante agradesimentu, Madre Jerál fó ba Prezidente Konferénsia inter-inspetoriál ida-idak lilin lakan ida no Konselleira sira oferese ba Kapitulár ida-idak tijolu ki’ik-oan ida, símbolu partisipasaun no kolaborasaun nian ba Kapítulu nia realizasaun.

Inaugurasaun ofisiál hahú ho desfile bandeira sira-nian: imajen ida moris liu atu dehan katak mundu tomak FMA nian simu bolun atu moris eventu kapitulár nu’udar momentu importante ida iha dalan Institutu nian. Ho entuziazmu no partisipasaun asembleia invoka Espíritu Santu ho knanau Veni Creator Spiritus.

Madre Yvonne Reungoat fó ninia Benvindu/a ba em ahotu prezente hodi hateten: “Ha’u haksolok ho im-ni aprezensa ih aami-nia leet, sinál estima no apresiasaun ba Institutu ne’ebé ohin selebra inísiu ofisiál KJ XXIII. Imi-nia horik iha ne’e fó onra mai ami no enkoraja ami atu moris esperiénsia kapitulár nu’udar eventu ekleziál no karizmátiku. Tema Kapítulu nian – sai ho foin-sa’e sir auma ne’ebé evanjeliza – sei sai sentru orasaun nian, reflesaun nian no dixernimentu nian ne’ebé ami sei partilla iha Asembleia Kapitulár. Tema ne’e hatán ba núkleu profundu liu ami-nia identidade karizmátika no  iha sintonia ho dalan Kreda nian ne’ebé Sínodu Bispu sira-nian kona-ba Evanjelizasaun Foun lansa no husi Papa Francisco ninia konvite, ne’ebé konvida foin-sa’e sira atu sai protagonista sira-nia moris nian, konstrutór/a ba sira-nia prezente no futuru iha Kreda no sosiedade.

Esperansa mak perspetiva atu hodi hateke ba mundu, hodi rona ninia hakilar, hodi interpela ninia dezafiu sira, mai husi pobreza foun no tuan sira ne’ebé ameasa la’ós de’it planu ekonómiku, maibé ida umanu, kulturál, sosiál, relijiozu. Ho foin-sa’e sira no ho komunidade edukativa tomak ami haka’as an atu harii uma fraternidade nian liuhusi relasaun umanizadora, ho kbiit mai husi espiritualidade Sistema Preventivu Don Bosco nian”.

Hafoin iha diskursu husi Kard. João BRAZ de AVIZ, ne’ebé oferese reflesaun ida kona-ba Vida Konsagrada, parte integrante Kreda nian, hodi evidensia dimensaun tolu importante liu: fila fali ho modu profundu no transparente ba ‘sequela Christi’, moris esensiál karizma Fundadór/a nian no loke an ba kultura atuál. Hafoin nia remata ho votus atu “Aman Maromak horik iha imi: se imi sente iha uma, imi sai mós uma ba foin-sa’e sira”.

Reitór-Mor mós, fó ninia liafuan ba Kapitulár sira no haksolok ho inísiu Kapítulu nian, ne’ebé akontese iha momentu istóriku, Tinan Bisentenáriu Don Bosco nia moris nian no besik ba Tinan dedika ba Vida Konsagrada, no tak ho liafuan sira tuirmai: «dezeju atu sai ho foin-sa’e sira, uma ne’ebé evanjeliza sei husu husi imi, ezisténsia ida moris iha radikalidade evanjélika, hodi manán nostaljia hotu tempu pasadu nian atu kontinua avansa ba hasoru tempu prezente ida nakonu ho fekundidade… Hanesan eskolante na’in rua ne’ebé iha dalan bá Emaus halo esperiénsia moris ne’ebé nakfilak, imi mós oh akbiit atu adere totalmente ba Jezús no asume ho ksolok misaun ne’ebé Nia entrega ba imi: hanaruk Ninia prezensa no sain Liafoun Di’ak ho foin-sa’e sira no ba foin-sa’e sira; katak, sai, dixípula misionária, atu ema hotu sente horik iha uma. Enkontru ho foin-sa’e sira sai mai ita fatin apostóliku enkontru nian ho Jezús. Na’i  hariak bensan ba imi”.

Reprezentante barak husi grupu oioin Família Saleziana nian ne’ebé marka prezensa, esprime sira-nia prosimidade ba Institutu, hodi subliña tema kapitulár nia importánsia.

Foin-sa’e na’in rua husi Inspetoria Roma nian, Anna no Jacopo, hodi sira nia maluk hotu iha mundu nia naran, lee sira-nia mensajen  ba FMA sira: “Imi sai mai ami ‘uma ne’ebé harii iha Fatuk leten’, iha-ne’ebé Maromak nia domin manifesta iha komuñaun fraterna, sinál konkretu ne’ebé dada foin-sa’e sira no halo sira sente iha uma. Espíritu ida família nian ne’ebé daet ema ida no ho modu graduál, halo ema ne’e tama iha ‘odamatan kloot’ ne’ebé lori ba enkontru ho Jezús no iha momentu ne’e mak ita bele rekoñese katak karizma mak don ida entrega mai ita, iha jestu loroloron nian ne’ebé akompaña ami-nia. Nune’e, jestu ida-idak no atensaun ba sir ane’eb’e ki’ik liu, hetan sentidu foun: ksolok atu sai instrumentu loos ida evanjelizasaun nian. Hamutuk ho imi ami sente protagonista misaun edukativa komún ida, sai ba foin-sa’e sira sleuk, uma ne’ebé evanjeliza”.

Molok remata abertura, Madre Yvonne, halo tiha verfikasaun kona-ba oinsá atuasaun iha  kumprimentu Konstituisaun no Regulamentu nia norma hotu, deklara ho modu ofisiál abertura Kapítulu Jerál XXIII Institutu FMA nian.

Serimónia taka ho knananuk ba Nai-Feto ne’ebé novisa FMA sira husi NOvisiadu Castelgandolfo no Roma nian aprezenta.

Iha loraik, Kapitulár sira halibur iha Aula Kapitulár ba aprezentasaun Regulamentu no Kronograma KJ XXIII nian. Hafoin ida-idak ba iha ninia Komisaun atu hili Prezidente, Vise-prezidente , Sekretária no Eskrutadora. Hala’o tiha eleisaun, asembleia remata ho juramentu ba eskrutadora no tradutora sira no ho orasaun kalan nian.