Tasi-Tolu (Dilia) – Iha loron 2 Outubru, iha Tasi Tolu parte Danau nian halao prosisaun ho Inan Virjen Maria Auxiliadora hodi selebra hamutuk Festa 150 Fundasaun Istituto FMA no tinan 34 Prezensa FMA iha Timor  ho oratorianu sira zona Dili nian, inan-aman oratorio sira nian  no familia Salesiana ne’ebé besik kada  Komunidade sira. Prosisaun halao iha Tasi Tolu, hahu husi Lagoa (Danau) tolu ( 3 ) ba lagoa (danau)  ida (1). Ami hamutuk Atus tolu resin (± 300) ne’ebé partesipa iha eventu kmanek ida ne’e.

Iha prosisaun ne’e reflete kona ba Madre Mazzarello nia itenrario no Virgem Maria nia moris tuir dalan momentu ida-idak hanesan: Madre Mazzarello nian reflete kona ba Casa nativa, Valponasaca, Valgelata, Borgo Alto, Colegio no Nizza Monferato. Iha Virgen Maria nia moris reflete kona ba: Anunciação, Visitação, Dalan ba Calvario, Kana’a, Maria primeira Dicipula,  Coroação no Maria Inan Misionaria sira nian. Maromak nia emar nain rua ne’ebé lao dalan naruk nakonu ho grasa no bensaun wain, sira lori nafatin grasa ne’e iha sira nia-an hodi ba fahe ba ema hotu ne’ebé sira hasoru no grasa hirak ne’e hadaet nafatin husi tempo ba tempo to’o ohin loron. Taka ho kuda ai oan haleu Kapela Danau 1 nian.

Reza tersu iha prosisaun ida ne’e atu hamutuk ita hasae agradese ba Maromak, tamba iha tinan ne’e Istituto FMA halo tinan !50 ninia ezistensia iha mundo nu’udar monumentu moris agradesimento S. João Bosco nian ba Maria Auxiliadora. Nune’e ho Inan Virgen Maria no S. Maria Mazzarello (Madre Mazzarello) nia harohan daet, ita husu grasa ne’ebé ita ida-idak presiza, ba familia sira nia intensaun, ba foin sa’e sira atu hatene halo discenimentu no foti lolos desizaun ne’ebé diak ba sira nia futuru, ba labarik sira atu moris iha Na’i nia grasa no protesaun no ba Madre sira atu imita tuir sira nia Co-Fundador a nia atitude hodi tau matan ba foin sa’e labarik sira tempo ohin loron  nian.

Kuda ai oan hanoin kona ba tempu kriasaun nian ne’ebé Amo Papa konvida ita atu rona kriasaun nia lian no tau matan ba uma komun.  Moris simples no moris solodaria ho ema seluk. Hodi kuda ai oan hatudu sinal haburas ita nia sentidu ne’ebé hatene kuida ema no kuida natureza. Aprende atu koñese Maromak nia maravilha loron ba loron iha kreasaun hotu ne’ebé hatudu Maromak nia liman fatin, nune’e halo ita hatene hahi no agradese ba Maromak domin nain.

Agradese wain ba sira hotu ne’ebé fo ona tempo no enerjia atu prepara ba eventu ida ne’e, liu-liu ba familia sira oratorianu nian iha Tasi Tolu no agradese wain mos sira hotu ne’ebé mai partisipa ona iha momentu istóriku ne’e.

(Noemia de Deus FMA)