Kardeál Carlo Maria Martini mate iha loron-sesta, 31 Agostu,ho tinan 85. Nia sofre Moras Parkinson no internadu iha enfermaria Aloisianum, iha Institutu Universitáriu “Estudos Filosóficos da Companhia de Jesus”, iha provínsia italiana Varese nian.

Ninia kondisaun sai piór ho lais iha kalan kinta nian no, Amu-Papa Bento XV, rona tiha, hasees an kedas iha orasaun. Kardeál nia isin-mate to’o iha Katedrál horisehik no aban, loron 3 Setembru sei hakoi nia hotutiha misa “corpo-presente”, iha tuku 4 loraik oras Itália.

Moris iha Torino loron 15 Fevereiru 1927, ho tinan 9 de’it  Carlo Maria Martini komunika ba nia parente sira ninia desizaun atu sai jezuita. Loron 25 Setembru 1944, tama iha Kompañia Jezús nian, no hala’o estudu filozofia no teolojia nian. Nia simu Sakramentu Orden bainhira tinan 25. Sai reitór tiha “Pontifício Instituto Bíblico” iha Roma iha 1962. Kona-ba siénsia ida-ne’e padre Martini maka estudiozu ida ho fama mundiál, katóliku ida mesak ne’ebé hetan admisaun atu tama iha komité internasionál ne’ebé serbisu ho testu krítiku Testamentu Foun nian, ne’ebé halo tradusaun bíblika ba mundu tomak no publika iha Greek New Testament. Tinan ruma tiha, iha 1978, nia sai reitór “Pontifícia Universidade Gregoriana”, molok sai arsebispu Milano nian, iha 1980, hodi bali arkidioseze ne’e to’o tinan 2002.

Entre inisiativa importante barak liu, buat ho destake boot maka harii “Eskola Liafuan nian” iha Milano: projetu ne’e konsiste iha tulun Maromak nia povu, liuliu foin-sa’e sira, atu hakbesik Sagrada Eskritura liuhusi métodu lectio divina. Nia mós hahú “Kátedra ba sira fiar-laek”, hodi promove enkontru oioin ba ema sira ne’ebé buka lialoos.

 

Iha tinan 1986 iha kongresu diosezanu kona-ba tema “sai maluk”, nia lansa eskola formasaun nian ba empeñu sosiál no polítiku ne’ebé luan ba beibeik (eskola karidade polítik anian).

Rezigna an tiha husi kargu arsebispu nian, kardeál Martini ni aprojetu maka kontinua ninia aprofundimentu estudu bíbliku sira iha fati espesiál liu ba nia katak, Jerusalém. Iha 2008, tanba motive saude nian nia tenke husik Jerusalém no filafali ba Itália.

Iha ninia atividade kolen-laek nia hetan rekoñesimentu no onra oioin nivel nasionál no internasionál.

Ho Kardeál Martini nia mate, koléjiu kardinalísiu agora kompostu ho purpuradu 206 no entre sira 118 eleitór no 88 la’ós eleitór. Kardeál jezuita sira oras-ne’e hamutuk 6 no entre sira 2 mak eleitór.