Roma – Loron 21 Setembru, Madre Yvonne Reungoat aprezenta ba Kapitulár sira tópiku “Kapítulu Jerál, eventu karizmátiku ida” .

Molok ninia aprezentasaun, Ir Maria del Carmen Canales hatudu panorama istóriku badak ida kona-Kapítulu Jerál anteriór haat: KJ XIX (1990) ho temátika “eduka foin-sa’e sira”; KJ XX (1996, ho tema “FMA: komunidade feto ho abut metin iha Kristu ho bolun ba misaun edukativa inkulturada hodi hakat ba miléniu datoluk”; KJ XXI (2002) ho tem “Sidadania evanjélika”; KJ XXII (2008) ho tema “Sai sinál no espresaun Maromak nia domin nian”.

Madre Jerál nia input lori Kapitulár  sira atu tama iha Kapítulu Jerál ho korajen no konfiansa. Ba Kapitulár sira nia dehan: “Imi ida-idak ne’ebé prezente iha-ne’e tanba Espíritu Santu mak hili imi atu fó ninia kontribuisaun hamutuk ho partisipante seluk, no ida-ne’e sei tulun ita loke an ba orizonte abanbairua nian ba Institutu. Ne’e mak hilin ida liuhusi mediasaun Na’i nian. Posibilidade ida-ne’e mak don ida ne’ebé tenke aseita ho ksolok no mós ho responsabilidade.  Molok sai organizasaun umana ida, Kapítulu mak eventu fiar nian iha-ne’ebé ita simu bolun atu aseita no kontempla Maromak nia mistériu liuhusi istória Institutu nian iha Kreda, iha Família Saleziana, no iha ema ida-idak nia moris”.

Madre Yvonne enfatiza valór unidade no komuñaun nian ne’ebé tenke karakteriza Kapítulu Jerál ida, ne’ebé la’ós de’it órgaun kolejiál governu no eleisaun nian, maski ne’e funsaun ida importante liu, maibé nia mak ‘enkontru ida irmán sira-nian ne’ebé sintoniza ho Espíritu Santu hodi buka Institutu nia di’ak. Nia mak dirije ita iha dalan, halo ita moris esperiénsia ida komuñaun no dixernimentu nian. Kapítulu mak eventu karizmátiku ida ne’ebé ennvolve Institutu tomak, no membru ida-idak tenke sente envolve an iha nivel oioin”.

Hodi kontinua ninia reflesaun, no nu’udar omenajen ba ita-nia Fundadór no Aman iha ninia Bisentenáriu mori snian, Madre Yvonne resalta Kapítulu Jerál rua dahuluk ne’ebé Don Bosco konvoka.   “Kapítulu ida-idak mak esperiénsia forte formasaun nian ne’ebé tulun atu sai konxiente liután kona-ba misaun entrega mai ita:  tahan dalan santidade irmán ida-idak nian no komunidade nian; komunidade edukativa ida-idka nian, no ho modu partikulár jerasaun foin-sa’e ne’ebé it atenke akompaña ho domin”.

Atitude importante ruma ne’ebé tenke iha durante Kapítulu mak: “silénsiu no dixernimentu”, atu kria klima ida silénsiu no orasaun nian atu husik Espíritu Santu nia roman penetra, no atu buka dalan sira “obediénsia no fiar nian; espíritu gratidaun nian , ksolok no respeitozu hodi manán “interese partikulár sira”, manán  ‘halerik’, no ‘gossi’ hanesan Papa Francisco dalabarak fó hanoin mai ita.

“Defaktu, Kapítulu la’ós Konferénsia ida, Semináriu ida, tempu atu aprezenta ideia abstrata sira kona-ba problema sira moris nian ita hasoru iha realidade atuál, maibé do ida, fatin ida grasa nian Espíritu Santu horik bá, estadu permanente dixernimentu nian moris nu’udar esperiénsia privilejiadu, nu’udar atitude konstante ida”.

Madre Yvonne remata hodi observa: “Ita moris Kapítulu Jerál iha Bisentenáriu Don Bosco nia moris nian. Ha’u hanoin katak nia sei sai eventu espesiál grasa nian iha-ne’ebé Espíritu Santu sei tulun ita atu sai entuziasta, hafoun an ih apaixaun da mihi animas cetera tolle nian no iha entrega: “Ha’u entrega sira ba ó! Atu ita-nia esperiénsia Kapítulu nian sai mós sasin vizivel katak bainhira ita moris Evanjellu, ita sai konstrutora dame nian, dame ne’ebé ita-nia nasaun barak presiza hetan atu manán pobreza, rai-kunan ba malu, persegisaun, no funu”.

Iha loraik, irmán sira iha oportunidade atu halo resonánsia kona-ba tema ne’ebé Madre Yvonne aprezenta, no barak mak foka kona-ba importánsia atu konjuga mistika no profesia.

Molok remata, Reguladora Kapítulu nian, Ir Chiara, aprezenta observsaun suma kona-ba “Strumento di lavoro” no Madre Yvonne komunika naran Sekretária Kapítulu nian: Ir Marisa Chinellato, no ninia kolaboradora sira Ir Palmira De Fortunati, Ir Cristina Merli, Ir Maria Pisciotta.