Iha Albánia Amu-Papa fó hanoin kona-ba rejisténsia sarani no rejime komunista
RV – Papa Francisco hahú ohin, 21 Setembru ninia viajen ba Albánia ho krítika hasoru estremizmu relijiozu, iha referénsia indireta ba jihadista Islamic State nian, no husu respeitu ba Direitu Umanu sira iha sirkunstánsia hotu.
“Atu laiha ema ida foti Maromak nu’udar defeza, enkuantu projeta no halo hahalok violénsia nian no opresaun nian!
Ema ida labele foti relijiaun nu’udar pretestu ba ninia hahalok sira kontráriu ba ema nia dignidade no direitu umanu fundamentál sira, prinsipalmente direitu ema hotu nian ba vida no ba liberdade relijioza”, nia deklara iha palásiu prezidensiál Tirana nian, kapitál país nian, iha prezidente albanés Bujar Nishani nia oin, autoridade polítika no membru sira korpu diplomátiku nian.
Papa Francisco gaba ezemplu “konvivénsia pasífika” no kooperasaun entre relijiaun sira iha Albánia.
“Klima respeitu no konfiansa resíproka entre katóliku sira, ortodoksu sira no musulmanu sira mak rikusoin folin liu ba país no hetan relevánsia espesiál iha ita-nia tempu iha-ne’ebé sentidu auténtiku relijiozu sai malahok, husi parte grupu estremista sira-nian”, nia subliña.
Papa Francisco ko’alia kona-ba Albánia, país ho maioria Islam ne’ebé moris iha rejime komunista nia okos entre 1944 no 1991, nu’udar “rai asu-wain sira-nian” no “rai mártir sira-nian, ne’ebé defende sira-nia fiar iha tempu difisil persegisaun nian”.
Amu-Papa nia diskursu dahuluk iha Tirana hatudu prioridade ruma ba futuru, hodi defende katak presiza hatán ba globalizasaun merkadu sira-nian ho “globalizasaun solidariedade nian” no akompaña kreximentu ekonómiku ho “respeitu boot ba kriasaun”.
Hafoin iha Missa iha Prasa Madre Teresa, Papa Francisco husik mensajen dame no esperansa nian ho apelu ba kompromisu katóliku sira-nian iha sosiedade.
“Ita bele dehan katak Albánia mak rai ida mártir sira-nian: bispu barak, amlulik sira no sarani leigu sira selu ho moris sira-nia fidelidade”, nia observa.
Amu-Papa dirije ba komunidade katólika “povu joven ida-nian”, atu fó apoiu katak sarani ida-idak iha “fatin no devér atu hala’o iha Kreda no sosiedade”, hodi konvida sira atu reforsa “tali solidariedade nian nune’e promove kondisaun moris ne’ebé justu no fraternu liután ba ema hotu”.
“Ha’u mai iha-ne’e atu enkoraja imi atu halo buras esperansa iha imi-nia laran no iha imi-nia sori-sorin”, Amu-Papa hateten.
Papa Francisco remata ho agradesimentu ba Kreda Katólika iha Albánia ba nina “ezemplu fidelidade nian ba Evanjellu”, hodi husu sira atu keta haluha terus uluk nian, maibé keta halo mosu “vingansa”.
“Imi-nia oan-mane no oan-feto barak terus tan Kristu to’o sakrifísiu moris nian. Sira-nia sasin tahan imi-nia ain-hakat ohin nian no abanbairua nian iha dalan domin nian, liberdade nian, justisa nian no, liuliu, dame nian”.
Ne’e mak viajen internasionál dahuluk Papa Francisco nian iha Europa, nasaun id ane’ebé S. João Paulo II vizita iha 25 Abríl 1993, atu restaura Kreda Katólika iha Albánia.
