Comoro – Dili, 30 Agostu – Ohin komunidade sira iha ispetoria Timor no Indonézia hamutuk ho ninia komunidade edukativa, foin-sa’e, labarik no familia Saleziana halibur iha  Comoro hasa’e hahi no agradese ba Maromak ba prezensa Madre Alma Castagna nian iha inspetoria.

Festa agradesimentu eh gratidaun ida ne’e sai ona tradisaun iha uma saleziana hahú husi Fundadór sira. Iha ne’ebé momentu atu agradese Maromak ba buat di’ak hotu ne’ebé ita simu husi Nia no agradese mós ba Ninia instrumentu sira liu husi ema hirak ne’ebé akompaña, gia no taumatan ba ita-nia moris espírituál nian.

Nune’e ohin, ho fuan ida deit ami irmán sira, komunidade edukativa, familia Saleziana, foin-sa’e no labarik sira husi komunidade 11 iha Timor no 3 iha Indonézia, agradese Madre Alma ba ninia prezensa nu’udar Inan, Biin no gia ba irmán idak idak ba komunidade edukativa no ba foin-sa’e labarik sira. Agradese ba madre nia governasaun nu’udar Ispetora iha Inspetoria Sta. Maria Doménica Mazzarello ne’ebé hatutan nafatin espíritu Valdoko no Mornese iha ami idakidak. Molok to’o iha festa ne’e komunidade idak idak haklean Madre Mazzarello nia surat sira  ho virtude : “ Domin, Ksolok, Korajen, haraik-an no Sinodalidade” nu’udar empenu ba komunidade idak idak atu moris tuir hamutuk ho komunidade edukativa no ho foinsa’e sira.  Nune’e mós halo lectio hamutuk husi Evanjellu Mateus Aprende husi Ha’u, tan Ha’u haraik-an no laran kmaus no ho S.F. Sales nia liafuan; “Halo buat hotu tan domin”.

Festa gratidaun ida ne’e hahu ho Eukaristia santa ne’ebé preside husi Pe. Apolinário Maria Neto SDB, iha salaun João Paulo II Comoro. Iha omilia Amu selebrante hateten katak : ”liafuan agradesimentu mak liafuan ne’ebé nakonu ho domin, nakonu ho grasa no esperansa nian. Madre Alma ne’ebé eperiénsia ona nu’udar gia no nu’udar inan aprezenta domin boot institutu nian, hatene lee situasaun, hatene lee moris iha vida konsagrada nian hatene lee situasaun rai nian no mós krize nafatin hakmatek simu ho pasiénisa hodi tuir Maromak nia hakarak. Agradese Madre Alma ne’ebé tau elementu esensial iha ita idakidak nia moris no iha ita idak idak nia komunidade mak Jezús. Liu husi ninia akompañamentu ba diretora sira, irmán sira no komunidade edukativa. Ohin ita hatudu ita-nia domin liu husi sentidu prezensa nian, sentidu komuñaun no sentidu partilla ita idak idak nia prezensa iha ne’e mak loos duni marka Maromak nia prezensa  iha asaun agradesimentu ida ne’e”. Hafoin Amu selebrante agradese Madre Alma hodi maluk Salezianu sira-nia naran ba serbisu hamutuk durante tinan neen nia laran ba apoiu, fó hanoin no fó atensaun.

Depoisde konfraternizasaun hatudu drama Madre Mazzarello nia moris iha familia, sai Filhas de Maria Auxiliadora no expansaun misionária dahuluk sira.

Hafoin Madre Alma fó mensajen ba irmán sira, komunidade edukativa, foin-sa’e no labarik sira hodi mensiona mós loron konsulta popular 30 Agostu nian hodi dehan katak loron konsulta popular iha 30 Agostu liu ba foin mak tuku 4 ema pronto atu ba vota ema hotu hatudu semangat, hatudu ksolok no hatudu solidariedade hodi ba tula sira ne’ebé moras no buat ne’e hatudu iha momentu ne’eba, Timor Oan ida idak nia domin ba nia rai. Nune’e mós ohin ita halo esperiénsia hanesan, domin ba ita-nia kongregasaun, domin ba malu,ksolok iha momentu sira ne’e. Nune’e Auguri ba ita hotu atu sente nafatin domin ida ne’e. Hanesan S. Francisco de Sales dehan: “Halo buat hotu tan Domin. Imi nia atraksi furak ne’e hatudu domin, ba ha’u hatudu domin ba ita-nia kongregasaun, domin ba ita-nia eskola ba ita-nia abut karizma nian. Abut ne’e buras bainhira ai-sanak sira la lao ketak maibé hotu iha uniaun. Agradese ba imi-nia atraksi ne’ebé hatudu sinodalidade. Serbisu hamutuk mak karakteristika ida Institutu nian, uluk kedas hahu, hahu ho labarik sira, menina sira no kolaborador/a sira. ha’u hein atu idak idak fila ba nia rai hatudu hanesan iha 30 Agostu iha momentu ne’eba hatudu mós ba ita-nia kongregasaun, haburas, habelar no hadaet ba foin-sa’e sira no ba leigu sira atu ita hotu hamutuk bele hadomi buat ne’ebé Espíritu Santu fó ba sosiedade no ba kreda katak ita-nia karizma.

(ComSoc TIN)