Dili 21 Agustu 2022 – Nudar oan feto sira ba Filhas de Maria Auxiliadora nian iha uma Divina Provvidenza, ho fuan gratidaun ami hamutuk ho ami nia Irma sira komunidade divina providensia selebra aniversario fundasaun Instituto FMA nian ba tinan 150. Nunee hamutuk ho ami nia irma nain hat ( madre Ma. Brigida me. Fabiola, madre Maria no madre Ermelinda, membro ADMA foun balun no Strutura ADMA ,ADMA Juvenil, membro balun ANTIGA ALUNAS, ami agradese liu husi Eucaristia santa nebe selebra iha komunidade Divina Providenzia.

Eucaristia santa ida nee selebra husi padre Julino SDB. Iha homilia padre konvida ami hotu atu agradese Maromak ba prezenza Maria Mazarello liu husi nia oan feto  sira nebe kontinua Don Bosco no Maria Mazarello nia misaun edukativa iha rai doben Timor-leste liu-liu ba labarik no foinsa’e feto no mane sira nia edukasaun.Grasa no bensaun Maromak fo tiha ona mai ita ida-idak liu husi Instituto ida ne’e maibe ita atu metin nafatin ba grasa ida nee mak presisa ita nia servisu makaas no pasiensia hodi kolabora ho Maromak atu kontinua hetan grasa ida nee. Nunee foinsae sira hakaas an nafatin atu disiplina iha servisu,estuda no orasaun atu bele aproveita grasa boot ida nee iha moris konkreto. Hanesan iha Evangelho ne’ebe dehan “imi sei haka’as-an atu tama husi odamatan klot.Hau dehan ba imi katak ema barak hakarak tama,maibe la bele JC”.Nunee padre dehan atu tama iha reinu lalehan presisa ita nia haraik an no disiplina ba ita nia an tamba ema barak hakarak atu tama liu husi odamatan ida nee maibe la bele tamba ita hanoin liu ba riku soin mundo nia. Riku soin mundu nian halo ita susar atu tama ba Na’I nia Reino husi odamatan klot ida ne’e.

Depois de Eucaristia, kontinua ho konfraternizasaun hamutuk no tuir  ho fahe primiu ba manan nain sira nebe hetan klasifikasaun iha aktividade hanesan sertame MM,vocal group,pinta no poesia nebe ami halao iha fulan rua  kotuk liuba.Tuir mai irma diretora komunidade divina providensia Me. Maria Brigida agradese tebes ba Amu selebrante nebe nafatin disponivel atu hatan ami nia konvite.Agradese mos ba ADMA,ADMA Juvenil,ANTIGA Aluna sira nebe nafatin disponivel hodi kolabora  ba ami nia aktividade hotu komunidade nian, no agradese ba grasa hotu ne’ebe simu.

Ksolok nebe ami sente ohin loron ami kontinua expresa hodi hatudo mos liu husi dansa no kanta husi groupo ida-idak husi ESTUDANTE UNIVERSITARIO sira,pratikante sira husi BAKERY no TOT, iha tempo hanesan hato’o mos poesia badak husi sira nebe mak hetan klasifikasaun dahuluk, no signifikativu liu tan wainhira ami hotu hamutuk hananu muzika ida ne’ebe compostu husi madre Brigida ami nia superiora, ho titulu: “ Madre Mazzarello nia domin”, no ikus liu ami taka ho musika 150 anos nian. Obrigada madre sira, obrigado ba Domin.

Hakerek na’in: Maria Fatima Ximenes.