Dili – Tinan-tinan, ba festa gratidaun inspetoriál, sempre iha preparasaun ho orasaun ba komunidade sira prezente iha Inspetoria, ho Lectio Divina ba komunidade edukativa tuir tema tinan nian, ho preparasaun teatru no dansa.

Tinan ne’e Lectio divina la’o ho tema estréia nian: “Halo buat hotu tan domin, la iha buat ida tan forsa”. Estréia tinan 2022 nian bolu Família Saleziana tomak atu koñese liután S. Francisco de Sales, nu’udar modelu ne’ebé Don Bosco tuir atu imita Jezús Kristu ne’ebé fuan maus no haraik-an. Ninia laran-midar ne’ebé sai espiritualidade no métodu, dada Don Bosco husi kedas ninia serbisu pastorál nia inísiu, no karateriza mós ninia estilu edukativu iha relasionamentu ho ninia foin-sa’e sira. Nia hanorin: «Karidade husi sira-ne’ebé fó orden, karidade husi sira ne’ebé tenke obedese sei halo Saun Francisco de Sales nia espíritu ukun iha ita leet» (Surat husi Roma 1884).

Pasajen evanjélika foti husi S. Mateus nia Evanjellu iha-ne’ebé Jezús konvida atu aprende husi Nia atu iha laran-kmaus no haraik-an (Mt 11,25-30): «Ha’u hahí ita, Aman,…Imi mai hakbesik ha’u… aprende husi ha’u, ne’ebé laran-kmaus no haraik-an».

Lectio ne’ebé Ir Maria Dolores prepara, fahe ba Irmán no profesór/a sira hotu atu bele prepara an ba loron orasaun Lectio Divina nian. Pasu sir ane’ebé propoin mak Statio, Lectio, Meditatio, Oratio, Contmeplatio, Discretio, Collatio no Actio.

Iha Collatio, profesór/a sira fahe ba grupu ualu tuir númeru Irmán sira ne’ebé partisipa. Pergunta mak: Hilin saida de’it mak ha’u tenke halo atu moris iha koerénsia ho Evanjellu ne’ebé ha’u lee no medita, nune’e iha fuan hanesan Na’i nian, moris tuir fraze S. Francisco de Sales nian no Don Bosco nia Sistema Preventivu?

Husi feedback grupu sira-nian, bele haree katak, S. Francisco de Sales nia liafuan no hanorin no Don Bosco nia Sistema Preventivu sai inspirasaun boot ba edukadór/a sira, liuliu leigu sira, la’ós de’it iha eskola maibé mós iha sira-nia família rasik. Sira barak hateten  katak foin-sa’e sira ohin nian la hanesna ho uluk nian. Iha uma-laran rasik susar atu korrije sira, maibé ho aprosimasaun, pasiénsia, rekoñese frakeza rasik no diálogu bele ajuda sira atu habadak distánsia entre otas.

Edukadór/a leigu/a sira agradese tebes, tanba eskola ne’e la’ós de’it buka atu halo knaar didi’ak no festa sira, maibé mós iha momentu sira hanesan orasaun hamutuk ne’ebé hariku tebes moris espirituál mós no relasaun sira.

(JG)