INSPETORIA FMA TIN SELEBRA TINAN 150 FUNDASAUN INSTITUTU FILHAS DE MARIA AUXILIADORA (FMA) iha CAILACO

Cailaco – 13 Agostu 2022. Ho fuan Magnificat nian Irmán sira iha Inspetoria Sta. Maria Domingas Mazzarello Timor – Indonézia selebra tinan 150 fundasaun Institutu Filhas de Maria Auxiliadora nian. Nune’e Irmán sira komunidade iha Timor halibur hamutuk ho foin-sa’e sira no povu Cailaco selebra festa ne’e iha komunidade Madre Maria Romero Cailaco, igreja Nossa Senhora do Rosário Cailaco.

Selebrasaun ne’e hahú ho Eukaristia santa ne’ebé prezide husi Bispu Dioseze Maliana, Don Norberto do Amaral ho Na’ilulik konselebrante hamutuk na’in 7. Iha omilia Amu Bispu Don Norberto, hateten katak; tinan 150 la’ós tinan no tempu ne’ebé badak maibé tinan naruk, iha ne’ebé deut moris ho terus no sakrifísiu sira iha moris loron loron nian. Hafoin Amu selebrante aumenta liután katak, hanesan iha Kana Galilea Maria Virjen laran metin totál ba nia Oan Mane, nia fiar metin ba nia Oan katak Nia sei halo milagre.

Depoizde Eukaristia santa, kontinuasaun ho seremónia inagurasaun Fatin Orasaun Maria Auxiliadora nian iha laletek Lehú. Rai ne’ebé harii gruta ba fó husi povu Cailaco ba Irmán FMA sira, ne’ebé prezente iha sira leet halo tinan 14. Fatin ne’e ida ne’e sei sai fatin orasaun ba povu Cailaco tomak atu haburas liután sira-nia fiar sarano no sira-nia domin ba Na’i-Feto no nu’udar dalan atu to’o Jezús no Maromak. Fatin orasaun ne’e hahú ho eskada kiik sira to’o boot, signifika ita-nia fiar hahú husi kiik, neineik-neineik sai boot. Hafoin estátua Maria Auxiliadora hamriik iha kabuar laran simbólu mundu, signifika Maria Virjen la’o hamutuk ho ita iha mundu ne’e nune’e mós iha tinan 150 prezensa Institutu Filhas de Maria Auxiliadora iha mundu. Pilar tolu iha kotuk, simbólu Santissíma Trindade nian: Aman, Oan no Espírito Santu ne’ebé sai hun no fundamentu ba ita-nia fiar. Torneira bee nian iha pilar sorin sorin hamutuk 12 reprezenta Apostólu na’in 12 nian, ne’ebé signifika katak husi Apóstolu sira nia haklaken kona-ba Kristu nia Evanjellu ba mundu tomak husi ne’e mak misionáriu sira lori fiar ida ne’e to’o iha Cailaco ne’ebé kontinua fó moris.

Iha liafuan agradesimentu nian, Madre Provinsiál Timor no Indonézia nian madre Alma Castagna FMA, agradese tebes ba povu Cailaco ne’ebé hanesan Don Bosco harii momentu moris ninia gratidaun ba Maria Auxiliadora hodi harii Institutu Filhas de Maria Auxiliadora nian, povu Cailaco harii momentu fatuk hodi agradese ba Maria iha tinan 150 aniversáriu IFMA nian.

(Alice Filipe FMA)