Cassa (Ainaro) – Nu’udar novisa Segundo ano, ha’u hetan oportunidade atu hala’o esperiénsia apostuladu fulan ida (Jullu-Agostu) iha komunidade foun iha Istituto  FMA no iha Inspetoria TIN (Timor-indonesia), komunidade Me. Rosetta Marchese. Sorte bo’ot mai ha’u, tanba bele realiza esperiénsia ida ne’e iha rai misaun hanesan Cassa ne’e ho di’ak, halo ha’u hanoin hodi tama didiak ba selebrasaun tinan 150 fundasaun Instituto nian. Kolejiu iha Nizza Monferatto ne’ebé bolu mós “uma domin Maromak nian,” ne’ebé sai abut ba komunidade hotu no kontinua moris hodi realiza santidade Saleziana iha foin-sa’e ki’ik no ki’ak sira nia le’et.

Iha tinan dahuluk novisa nian, ha’u tama hodi haklean  Istoria Istituto nian no agora ha’u  haksolok no sente sorte tanba esperimenta  ksolok Mornese nian ne’ebé Irmán sira transmite ba labarik no foin-sa’e sira iha ne’ebá. Ha’u admira ba irmán ida-idak nia laran manas ba misaun, ne’ebé fó tempu barak atu manán  klamar sira hodi buka atu sai kriativa iha sira nia realidade.

Esperiénsia la to’o de’it atu hela sai istoria maibé, sei sai bukae ida mai ha’u atu kontinua buka no deskobre Maromak nia hakarak liu husi ema hotu ne’ebé ha’u hasoru. Ha’u agradese ba labarik no foin-sa’e sira, husi sira ha’u aprende atu hilin buat ne’ebé fó ksolok ho dalan los nian. Agradese ba Me. Sebastiana no komunidade ba espíritu família nian no komunidade ne’ebé sai uma ba ema hotu. Agradese ba ha’u nia formadora sira no liu-liu ba Me. Alma Castagna ba konfiansa tomak hodi haruka ha’u ba, nune’e  ha’u deskobre liutan rikusoin karisma Saleziana.

Obrigada wa’in.

Nov. Lestari Daeli