Festa Transfigurasaun Na’i nian hahú selebra iha Oriente iha sékulu V, no iha Osidente iha 1457.

Transfigurasaun ne’ebé akontese molok anúnsiu Paixaun no Mate nian, prepara Apóstolu sira ba komprensaun mistériu ne’e nian. Ho objetivu hanesan mak Igreja selebra festa ne’e loron haatnulu molok Ezaltasaun Krús nian, iha 14 Setembru. Transfigurasaun, manifestasaun vida divina, ne’ebé horik iha Jezús, mak antisipasaun glória nian, ne’ebé sei hakonu kalan Páskua nian. Apóstolu sira, bainhira haree Jezús nia kondisaun Atan nian, labele haluha ninia kondisaun divina.

Transfigurasaun konfirma Apóstolu sira-nia fiar, ne’ebé Pedro hatudu iha Cesareia Filipe nian, no tulun sira ultrapasa sira-nia opozisaun hasoru perspetiva paixaun ne’ebé Jezús fó sai ba sira. Ema ne’ebé hakarak sai nia dixípulu, tenke partisipa iha ninia sofrimentu sira (Mt 16, 21-27. Transfigura mak glória divina Oan-Mane ninia nabilan dahuluk, Nia ne’ebé simu bolun atu sai Atan terus-na’in ba ema sira. Iha orasaun, Jezús nakfilak an no husik Apóstolu sira haree ninia identidade sobrenaturál. Moisés no Elias mao protagonista sira Ézodu nian diferente liu iha sirkunstánsia sira, maibé idéntiku iha motivasaun: fidelidade absoluta ba Maromak. Naroman Transfigurasaun nian klarifika interiormente dalan iha rai ne’e. Bainhira vizaun atu remata, Pedro hanesan koko atu para tiha tempu. Nune’e mak kalohan ida falun tiha nia no nia maluk sira.

Ne’e mak kalohan prezensa Maromak nian. Mistériu ne’ebé revela maibé ita kontinua la koñese. Maibé Pedro, Tiago no João simu roman nabilan liu: lian lalehan nian ne’ebé proklama Jez’us nia identidade, OanMane no Atan Terus-Na’in (kf Is 42, 1).

MEDITATIO

Jezús haruka ninia dixípulu sira harohan (kf Lc 9, 28b-36). Ohin, nia foti nia Apóstolu prediletu sira, Pedro, Tiago no João atu halo sira harohan naruk no íntimu liután. Sira na’in tolu reprezenta ho modu partikulár klamar konsagrada sira ne’ebé simu bolun ba perfeisaun,. Atu harohan Jezús gosta solidaun, foho, iha-ne’ebé dame, hakmatek mak ukun, iha-ne’ebé bele haree Maromak nia liman-fatin iha kalan ho fitun nabilan. Transfigurasaun mak vizaun ida lalehan nian. Iha loron transfigurasaun Na’i hatudu nia Oin furak. Nia oin nabilan hanesan loron. Apóstolu sira ne’ebé fó sasin ba transfigurasaun nakonu ho domin no ksolok.

Ne’e mak grasa estraordinária ba Apóstolu na’in tolu. Ita la presiza kaer metin grasa estraordinária sira. Pedro hakarak kaer metin ne’e. Nia sla, Nia hakarka hela iha foho leten: “Ita halo taka-baluk tolu”. Nia lahatene saida mak nia dehan. Vizaun lakon iha kalohan ida nia laran. Iha ne’e iha lisaun ida mai ita hotu. Mai ita halo orasaun sai toman ida, halo orasaun kontmeplasaun nian. Ita la buka grasa estraordinária sira. Se sira grasa sira mai, ita la kaer metin.

Festa ne’e nia rezultadu mak, uluknanai kreximentu fiar nian. Apósotlu sira fó sasin katak sira haree Makso’in nia glória (kf 2Pd 1, 16) sira sai sasin kona-ba Redentór nia kbiit no glória. Sira rona lian husi lalehan iha foho leten iha transfigurasaun nia glória laran: “Ne’e mak ha’u nia Oan doben. Imi rona Nia bá”.