Dili, 05.08.2022. Ohin loron furak no nakonu ho ksolok ba FMA iha mundo tomak ne’ebé selebra 150 Fundasaun Istitutu nian. Ohin iha Ispetória TIN selebra Votus Perpetua ba Irmán nain 5 (Lima); 4 (Hat) iha Timor mak Ir. Cherly, Ir. Josefa, Ir. Libania no Ir. Olviana no ida iha Mornese-Italia mak Ir. Maria Sarmento. Misa Solene ne’e Pe. Andre Calleja, SDB mak prezide ho Padre Ko-selebrante sira.

Iha okaziaun especial ida ne’e iha omilia Padre hato’o mensajen ne’ebé  furak los ba ema hotu ne’ebé  partesipa iha selebrasaun Eukaristia ne’e. Padre dehan: “Ha’u hahu hato’o uluk mensajen ba imi nain Hat (4) ne’ebé ohin ho ksolok no aten brani hodi hatan ba Maromak ba nafatin. Maromak hadomi liu imi, Nia bolu imi wainhira imi sei iha imi nia knotak no Nia prepara kedas ona imi, liu husi familia, formasaun sira no ohin imi bele hatan ba bolu ne’e iha fatin ne’e. Ba FMA ida-idak ne’ebé ohin selebra tinan 150, imi haksolok ba, tamba hanesan Dom Bosco dehan “imi mak monumentu moris ninia agradesimentu nian  Maromak”. Imi lori domin ne’ebé imi simu ba sira hotu ne’ebé imi hasoru. Ba aman-inan no familia sira ne’ebé ho laran luak oferese ona imi nia oan sira ba Maromak liu husi Kongregasaun FMA hodi servi foin sa’e sira. Imi haksolok ba tamba Dom Bosco asegura katak, familia ne’ebé oferese ona imi nia oan ba Maromak, Jesus rasik mak sei taka fali nia prezensa iha imi nia familia”.

Iha Me. Alma nia liafuan agradesimentu nian, Madre dehan: “Iha hau nia liafuan ikus ne’e, hau hakarak dehan buat ruma kona ba sira nia simblo ‘ahi oan’. Ohin iha ofertório sira lori ki’ik los, no wainhira sira lori ba tau iha fatin ne’ebé prepara ho banku bo’ot, ha’u hanoin, koitadu. Hare ba ita ne’ebé ohin halibur iha ne’e atu selebra festa ne’e, ita sente buat ruma bo’ot. Maibe ita hateke ba mundo se mak liga momentu ida ne’e. Buat ruma ki’ik iha mundo ne’ebé bo’ot maibe ahi lakan nafatin. Ohin maski loke ventuinha ne’ebé hu’u, maski ema simu komuñau lao hodi halo sira nia ain besik ba ahi oan ne’e maibe ahi oan ne’e kontinua lakan. Nune’e ba sira mos, agora sira haksolok, aban bainrua ba fali komunidade pasti hasoru difikuldade no susar ruma parese anin hu’u, maibe se ksolok ne’ebé ohin imi hatudu laos buat ruma superfisial, mai husi laran, buat sira ne’e halo ahi book-an ituan parese mate maibe depois kontinua. Nune’e augurio ba imi atu mantein nafatin ksolok ida ne’e to’o moris rohan laek. No mos Ba familia sira, tempo susar sei mai ba hotu, maibe hanesan ohin Padre dehan ‘oan ida ne’ebé konsagra-an ba Maromak hanesan tiket promo ba lalehan no fasilita ba familia tomak atu hetan ksolok. Ita nafatin suporta laos deit agora hare sira haksolok los ona, sira perpetua laiha ona buat ida. Maibe hau dehan ona sei hetan susar nune’e orasaun familia nian no buat ne’ebé halo ami hotu lao ba oin ho hakmatek. Hau husu familia sira atu kontinua akompaña imi nia oan sira.

Ami selebra 150 Anos, ema karik tinan 150 katuas no ferik liu no oin namkurut los. Maibe bele dehan Istitutu nia oin bele dehan kontinua foin sa’e tamba iha irman sira hanesan sira nain Hat (4) ne’ebé kontinua saran sira nia moris. Nune’e Istitutu bele sustentavel tamba nafatin ho irman foun ne’ebé tama no hafoun Istitutu nia moris. Ita agradese ba sira hotu ne’ebé dehan tiha ona sira nia ‘SIM’ ba sira ne’ebé ohin dehan partikular ba nafatin, ba sira ne’ebé sei tuir, ba sira ne’ebé sei hanoin hotu hanesan ne’e maibe ita sente hodi agradese Maromak tamba iha poster ne’ebé iha kotuk  ne’ebé hatudu husi tinan 150 irman nain hira liu no haklaken Maromak nia domin.  Ita reza ba Istitutu atu nia oin foun nafatin ba foin sa’e sira no labarik sira atu hetan Maromak nia domin iha irman sira nia prezensa. Obrigada”.

Tebes duni, la to’o deit selebra tinan 150 Istitutu nian no selebra votus perpetua, maibe liu sira ne’e hotu mak metin iha Maromak nia domin iha orasaun hodi reza ba malu no lori Maromak nia domin ba ema hotu ne’ebé ita hasoru liu-liu foin sa’e sira no labarik sira. Mai ita reza ba malu.

(Noemia de Deus, FMA)