Mornese, 05 agostu 2022

 

Madre Chiara Cazzuola nia mensajen husi Mornese ba tinan 150 Fundasaun Institutu Figlie di Maria Ausiliatrice nian

 

Irmán doben sira, foin-sa’e doben sira, kolaboradora no kolaboradór sira, belun sira, membru sira Família Saleziana nian, ha’u kumprimenta imi husi Mornese, ita-nia uma, ita-nia sentru unidade nian, hanesan salmu 87 afirma bainhira ko’alia kona-ba Jerusalém, ita bele dehan katak iha país ne’e “ita hotu moris”. Fatin ne’e sai nafatin fatin ne’ebé FMA sira hotu nia matan hateke bá, basá ita-nia Inan Maria D. Mazzarello nia santidade, hakerek liafuan moris sira iha fatuk sira, iha baki sira, iha rai isin ne’ebé agrikultór sira fila, iha profundidade espíritu nian. No ohin, ho fuan iha Mornese, husi komunidade hotu mundu nian, husi loron-matan sa’e to’o loron-matan monu, hasa’e knananuk ida hahí no agradesimentu nian ba Maromak ba kmanek sira Nia hala’o iha istória no iha ita ida-idak nia moris.

Iha aniversáriu 150 fundasaun Institutu nian, ida-idak hafoun Aliansa domin nian ho Na’i no esprime gratidaun profunda ba foin-sa’e feto no mane sira nia moris nakonu no naresin ne’ebé entrega ona mai ita no sei entrega mai ita. Hamutuk ita selebra vitalidade no freskura karizma nian ne’ebé enkarna iha tempu iha kontestu kulturál uain mundu nian.

Iha 5 Agostu 1872 duni mak Don Bosco fó naran ba ita-nia Família relijioza ne’ebé Maria nian tomak:

«Imi iha nu’udar glória imi-nia títulu furak Filhas de Maria Auxiliadora nian, no imi hanoin beibeik katak imi-nia Institutu tenke sai monumentu moris Don Bosco nia gratidaun nian ba Maromak nia Inan kmanek boot, invoka ho títulu Sarani sira nia Tulun». Don Bosco haree iha Maria fundadora no inspiradora ninia obra nian. Husi inísiu Institu nian kedas Nia mak Superiora loloos basá nia mak Inan (Konst 114).

Madre Mazzarello nia jestu atu kalan-kalan tau uma nia xave sira iha estátua Maria Auxiliadora nia ain sira mak espresaun konkreta ida kona-ba konfiansa totál iha ninia tulun no rekoñesimentu kona-ba ninia prezensa domin-na’in no konstante.

Ita hafoun konfiansa ne’e iha ninia prezensa no ita saran an ba Nia atu nia kontinua sai mai ita Inan no Tulun-na’in no gia ita iha dezafiu atuál sira ne’ebé ita konsidera nu’udar Maromak nia bolun foun sira.

Hodi hanoin hikasfali tinan 150 istória nian, ohin, ha’u haakarak agradese ho modu partikulár Irmán misionária sira oras dahuluk nian ne’ebé Don Bosco no Madre Mazzarello haruka no misionária hotu ne’ebé mai tuir iha tempu, ne’ebé hala’o ona no kontinua hala’o knaar fundamentál atu habelar no halo sai boot karizma salezianu ba sira ne’ebé ki’ik no kiak liu nia di’ak, iha kondisaun no kontestu oioin ne’ebé la hanesan.

Ha’u-nia agradesimentu ba imi hotu Irmán doben sira, ba don imi-nia moris nian iha ksolok ba Na’i iha ita-nia Famílai relijioza furak ne’e. Ha’u fiar katak rikusoin boot liu Institutu nian la’ós estrutura sira, maski furak no efisiente, maibé imi ida-idak ho imi-nia fidelidade ba Jezús no ba misaun ne’ebé Nia konfia mai ita.

Rikusoin folin boot liu ne’ebé ita-nia Institutu soi mak FMA ida-idak nia moris, sira ne’ebé hala’o knaar animasaun no governu, nune’e mós sira ne’ebé hala’o serbisu iha silénsiu iha ninia moris loroloron nian. Irmán foin-sa’e no nakonu ho enerjia no vitalidade mak rikusoin ida no Irmán ferik ka moras ne’ebé gasta nia moris tomak atu realiza ‘da mihi animas – A te le affido’ mak rikusoin ida.

Lahó imi, Irmán doben sira, ita labele hateke ba futuru.

Ha’u agradese maun-alin Salezianu sira hotu no Família Saleziana tomak ne’ebé ita hetan grasa atu partilla espiritualidade komún no dalan hanesan santidade nian.

Obrigada ba amiga no amigu sira ne’ebé kompartilla karizma no fiar hamutuk ho ita iha edukasaun nu’udar fatór transformasaun sosiál no ekleziál.

Obrigada ba foin-sa’e sira feto no mane. Ba labarik sira feto no mane ne’ebé Maromak no Maria Auxiliadora konfia mai ita iha Kontinente lima no ba ema hotu ne’ebé halo parte  iha ita-nia moris no ita-nia istória.

Selebra katak hasa’e agradesimentu ba dalan ne’ebé hala’o ona, maibé mós atu hateke ba futuru, ba dalan ne’ebé kontinua. Dala ida tan lori ba hanoin hikasfali Madre Mazzarello basá ninia empeñu edukativu dudu nia atu hahú husi nesesidade imediatu sira, atu halakan esperansa, orienta ba valór sira, ba misaun ida ho respiru luan ne’ebé ohin ita sira-ne’e mak sinál no ninia atualizasaun mundiál.

Realidade ne’ebé ita moris bá, husu atu ita iha hateken atentu ba foin-sa’e feto no mane sira basá, hodi la trai fekundidade karizmátika orijen nian, ita hatene kontinua halo buras karizma iha tempu no iha kultura sira hodi orienta ba hilin di’ak nian ba juventude, espesialmente ba feto sira.

Iha KJ XXIV, nu’udar FMA, ita afirma hikasfali katak perspetiva edukativa Sistema Preventivu nian mak forsa ne’ebé bele envolve foin-sa’e sira feto no mane iha projetu komún ida. Iha orizonte ne’e, formasaun integrál iha vizaun antopolójika kristán sai empeñu atu akompaña sira hodi apoia sira iha babukak sentidu moris nian, iha konstursaun futuru ida dame nian, iha fraternidade, iha responsabilidade ba di’ak komún.

Atu Auxiliadora, ne’ebé iha reprezentasaun santuáriu nian, harii iha sentenáriu fundasaun Institutu nian (1972) iha Mazzarelli iha Mornese, ne’ebé haliis nia an ba Maria Mazzarello, mai mós hasoru ita hotu, iha dalan ne’ebé loke ba futuru, atu iha babukak dalan foun sira ba edukasaun ita la halakon inspirasaun orijinária no ita sai fiél ba radikalidade ‘da mihi animas cetera tolle no A te le affido’ nian. Atu Nia fó apoiu mai ita ida-idak no ita-nia komunidade edukativa sira nia dalan santidade nian, basá santidade mak oin furak liu Institutu nian, segredu vitlaidade misionária no vokasionál.

 

Buona festa e buona continuazione del cammino!

 

Ir Chiara Cazzuola

Superiora Jerál Institutu FMA nian