Lu Monferrato –  Kapitulár sira, iha loron 18 Setembru, halo peregrinasaun ba Madre Angela Vallese nia rain iha Lu Monferrato, ne’ebé iha tinan ne’e selebra ninia sentenáriu mate nian.

Madre Angela Vallese mak pioneira FMA  misionária iha espedisaun misionária dahuluk, loron 14 Novembru 1877, husi portu Genova nian bainhira foin tinan 23 ho Ir Giovanna Borgna (tinan 17), Ir Angela Cassulo (tinan 25), Ir Angela Denegri (tinan 17), Ir Teresa Gedda (tinan 24), Ir Teresina Mazzarello (tinan 17), hamutuk ho padre Giacomo Costamagna sdb no salezianu seluk.

Maski sira foin-sa’e liu, lahó koñesimentu kona-ba kontinente foun, maibé sira-nia disponibilidade totál no sira-nia prontidaun ba sakrifísiu, sira-nia an tomak saran ba Na’i no foin-sa’e sira, halo atu sir-ania misaun sai fekundu.

Depoizde moris hodi tomak gasta iha misaun ne’ebé entrega ba nia, iha tinan 1013, nia bá Itália atu partisipa Kapítulu Jerál VII. Nia to’o iha Itália ho ho idade 59, maibé saúde ne’ebé mohu tan serbisu kolen-laek no privasaun sira misaun nian, nia tenke hela iha Nizza Monferrato, no liutiha tinan ida, iha loron 17 Agostu 1914, misionária pioneira ne’e, husik mundu ne’e ho fuan no hanoin tomak ba ninia emar sira iha Amérika ne’ebá.

To’o iha Lu Monferrato, amu pároku salezianu, P. Piergiorgio Verri no administradór Francesco Michele Fonte (antigu alunu FMA) fó benvinda ba Kapitulár sira. Administradór, husi populasaun nia parte husu atu FMA sira “Keta husik ami mesak, ita sei iha estrada naruk atu halo hamutuk”.

Hafoin Inspetora Piemonte no Valle D’Aosta (IPI), Ir Elide Degiovanni agradese Madre Jerál no Kapitulár sira ba sira-nia prezensa no halo votus atu karizma ne’ebé moris iha rai Monferrato bele kontinua habelar no lakan nafatin.

Programa kontinua ho Selebrasaun Eukarístika ne’ebé Mons. Alceste Catella, bispu Casale (Alessandria) nia prezide hamutuk ho Pároku no pároku seluk zona nian, sinál prezensa ekleziál.

Iha omilia, Amu-Bispu fó hanoin kona-ba Madre Angela nia figura simples, no konvida partisipante sira ba konversaun. Ita –nia moris la konta buat ida. “Hodi sai nakloke de’it, haraik an, kiak, mak ita husik espasu ba grasa”. Ni aresalta: “Se ita la tau an iha sentru, Maromak bele halo kmanek oioin no boot iha ita”.

Hafoin Ir Maria Vanda Penna aprezenta livru ne’ebé nia edita kona-ba Madre Angela Vallese nia surat sira. Iha aprezentasaun livru nian, Ir Vanda hateten: “Deskobre figura ita-nia misionária dahuluk ne’e bele habiit fali ita-nia espiritualidade no fó kbiit foun ba ita-nia karizma. Surat sira, subliña valór sira ne’ebé sai sentru ba irmán Angela: orasaun iha konfiansa, sakrifísiu, santidade halo ho fidelidade loroloron nian ba devér rasik, umildade profunsa, sentidu obediénsia nian kusta karik bá, konxiénsia boot katak vida espirituál sai tasak iha sasin evanjeliku, paixaun evanjelizadora…”.

Madre Jerál iha ninia liafuan, agradese ho modu espesiál irmán sira komunidade Lu nian ba sira-nia benvinda fraterna. Nia resalta katak “família mak knuuk vida sarani no vokasaun nian. Rai furak ne’e, ne’ebé ema ruma define nu’udar ‘úniku iha mundu’, sai famozu tanba fó moris ba Madre  Angela Vallese, ba Beatu Don Filippo Rinaldi, ba FMA lubuk ida, ba Salezianu no amlulik seluk, relijiozu no relijioza sira. FMA 91 moris iha Lu! Ita agradese Na’i ba fiar forte no família sir ania domin iha rai ne’e, knotak fekundu ba moris no dosilidade ba Na’i. No ita hein katak Na’i hamosu seluk tan…”

Hafoin Kapitulár sira hakat na uma ne’ebé Madre Angela moris hodi tau plaka dedika ba nia. Prezente iha ne’ebá Madre Angela Vallese ninia bei-oan ida, naran Rosalba. Husi uma natál, irmán sira hakat ba igreja S. Nazario, fatin ne’ebé Madre Angela Vallese simu Batizmu.

Madre Jerál simu mós benvinda husi labarik sira husi “Jardim da Infância” FMA sira nian ho prezente bolsu estudu misionáriu ba Inspetoria Uruguay nian.

Hotu tiha almosu iha fraternidade, irmán sira iha posibilidade atu para iha uma moris-fatin Beatu Filippo Runaldi nian.

Irmán sira kontinua viajen ba Roma no to’o iha kalan tuku 9.30.