Venilale – Iha loron 28 Jullu 2022, Família Saleziana kompostu husi ADMA, Salezianu Kooperadores, Antigas/os Alunos/as, Komunidade Edukativa no Kolaboradora sira hamutuk na’in 28 halibur hamutuk iha komunidade Madre Mazzarello tuir Mazzarello Camp. Depoisde orasaun hamutuk tiha iha kapela, fahe ba grupu tolu hodi  haklean Madre Mazzarello nia moris liu husi irman sira no mos husi pergunta sira ne’ebe reflete.

1. Oinsá imi valoriza orasaun familia nian?
2. Oinsá imi eduka oan sira?
3. Nu’udar edukadór/a saida mak imi hakarak halo ba imi nia familia?

Nune’e iha momentu partilha nian dehan katak orasaun iha familia importante tebes tanba orasaun mak momentu ida  koalia ho Maromak nu’udar familia hodi husu grasa no bensaun no mos husu harohan ba ema seluk nia presiza. Hare ba Main nia familia ne’ebe eduka Main iha nivel espiritual no umanu, nu’udar Familia Saleziana   presiza mos eduka oan sira ho pasiensia no ho domin, la ho represivu. Hanorin oan sira hatene nia obrigasaun nu’udar sarani no  iha korajen atu koriji bainhira halo sala. ikus liu, nu’udar edukador/a hakarak moris nu’udar ema domin nain, pasiensia ba malu, fiel ba malu, fiar malu no haree ema seluk hanesan familia rasik.

(ALICE FILIPE FMA)