Baucau – Ho ksolok no fuan gratidaun nian ohin 25-7-2022 ami irmán sira komunidade Baucau hamutuk ho oratoriano sira, OPIAM, ADMA, Kooperadores no oratoriano sira nia inan aman, hodi hasa’e hahi no agradese ba Na’i liu husi selebrasaun Eukaristia iha Parokia st. António, Baucau, ba prezente vokasaun ne’ebé Nai haraik ba Institutu Filhas de Maria Auxiliadora hodi hanoin fali Institutu nia moris ne’ebé Don Bosco harii nu’udar “monumentu agradesimentu nian ba Maria Tulun-Na’in.” Don Bosco serbisu hamutuk ho Santa Maria Domingas Mazzarello hodi anima Institutu ida ne’e la’o ba oin ho Espiritu Santu nia inspirasaun, atu taumatan ba labarik no foinsa’e sira nia klamar liu-liu sira ne’ebé ki’ak liu.

Selebrasaun ne’e prezide husi pe. Agnelo Moreira SDB, iha nia homilia haktuir: Maromak nafatin haraik Nia grasa liu husi Maria nia intervensaun direita nune’e misaun Salesiana habelar ona iha mundu tomak no hamutuk ho Maria hanesan iha Kana, FMA idaidak simu kna’ar atu taumatan ba foinsa’e sira no tenke sai sinal atu salva ema. Selebrasaun ne’e konvida fali FMA idaidak kontinua hala’o misaun ho domin no laran manas cetera tolle nian atu manan klamar wain ba Maromak, hanesan DB dehan; ema hotu ne’ebé tama iha ha’u nia uma ne’e Maria mak lori mai. Hafoin kontinuasaun ho seremónia hodi han hamutuk, no oratorianu sira mós hakarak fahe sira nia domin no ksolok hodi kumprimenta Irmán sira liu husi dansa oioin no ikus fahe prémiu ba manan nain sira iha konkursu MM nian.

(Onesiana Costa FMA)