Kapítulu online – Konkluzaun Ezersísiu espirituál

Torino/Nizza – Loron tutun nian ba Kapitulár sira, ohin ho peregrinasaun ba Rai-Santa Valdocco-Torino no Nizza Monferrato. To’o tiha iha Valdocco, irmán sira iha posibilidade atu vizita Don Bosco nia kuartu no Bazílika Maria Ausiliadora ho altár sira dedika ba Madre Mazzarello, ba Don Bosco, ba Domenico Savio…molok Missa iha tuku 11.00, nu’udar konkluzaun ba Ezersísiu Espirituál.

Anima iha kantu sira ba Selebrasaun Eukarístika mak alunu/a sira “Scuola Maria Ausiliatrice di Torino 27” nian, no prezide husi pregadór, arsebispu Thomas Menamparampil, ne’ebé iha ninia omilia fó hanoin kona-ba “sentralidade Kristu nian iha vida konsagrada no atensaun ba Espíritu ne’ebé leno no hafoun hikas dalan”.

Nia ezorta FMA sira atu sai nafatin konxiente kona-ba moris ho fiar, hodi fó sasin pesoalmente katak Jezús  mak Dalan, Lialoos no Moris, no halo nune’e sei lori mudansa ba Kreda no ba sosiedade. Basá ho FMA 13.000, FMA ne’ebé nia moris sasin Reinu, konserteza sei lori duni renovasaun ba Kreda no ba mundu. Nia mós konvida irmán sira atu halo tuir Maria nia liafuan ne’ebé dehan “halo buat hotu ne’ebé Nia dehan ba imi”.

Hotu tiha Missa Madre Jerál no irmán sira Konsellu Jerál nian hakbesik ba Don Bosco nia altár no Madre Yvonne harohan nune’e: “Husi kontinente 5 no nasaun 94 ami mai iha-ne’e iha ita-nia oin, Don Bosco, atu halakan fali iha ami forsa Da mihi animas nian ne’ebé ita husik nu’udar liman-rohan folin liu. Ami mak monumentu moris nian ita-nia agradesimentu ba Maria Ausiliadora, inspiradora, gia, mestra no fatuk-inan ami-nia komunidade sira hotu namkari iha mundu. Iha Nia, Inan no tulun kbiit-na’in, ami deskobre hikas ami-nia identidade Oan-Feto nian. Ami husu ita, husi ninia intersesaun, atu harai bensan mai ami-nia Asembleia kapitulár iha babukak laran-manas nian kona-ba Maromak nia hakaran ba iNstitutu atu bele sai loos duni, ohin, ho foin-sa’e sira uma ne’ebé evanjeliza”.

Tuirmai, Madre jerál no irmán sira Konsellu nian, ho selebrante sira, hakat ba Madre Mazzarello nia altár no, hamutuk ho Kapitulár sira, husu Madre Mazzarello atu “tahan FMA sira iha dalan santidade nian atu halo sira sai don korajozu ida Maromak nian no atu halo ho forma iha-ne’ebé foin-sa’e sira bele rekoñese beleza atu halo sira-nia an don ida ba Nia”.

Hafoin, sira entrega ba Madre Mazzarello eventu KJ XXIII atu bele kontinua saran an iha Maromak nia liman iha fidelidade ba ninia providénsia.

Iha loraik tuku 14.00 Irmán Kapitulár sira kontinua sira nia peregrinasaun ba Nizza, Uma daruak ne’ebé sai Uma Jerál iha Madre Mazzarello nia tempu to’o nia mate iha 13 Maiu 1881. Iha-ne’ebé foin-sa’e sira sai gia ba irmán Kapitulár sira hodi vizita fatin istóriku ne’e tuir grupu linguístiku oioin. Nizza sai signifikativu la’ós de’it tanba Don Bosco haree Maria nia prezensa ne’ebé pasiar iha uma no proteje nia ho nia mantu, maibé mós tanba iha-ne’e mak fatin Madre Mazzarello akompaña, forma FMA sira, haruka ba misaun, oferese nia moris ba Institutu nia santidade. Iha ninia kuartu, bele hetan meziña ne’ebé nia uza atu hakerek surat hamutuk  44 ba irmán FMA sira iha Itália no Amérika, husi surat 68 ne’ebé to’o mai ita, ho ninia hanorin sira, fonte ba ita-nia espiritualidade. Bainhira to’o iha Nizza, Kapitulár sira tama kedas iha Santuáriu atu agradese Maromak no Na’i-Feto, ba irmán barak ne’ebé uluk ona ita ba sira-nia fidelidade, no iha-ne’ebá Irmán Piera fó hanoin katak Madre Jerál na’in haat mate no hakoi iha rate Nizza nian: Madre Mazzarello, Madre Caterina Daghero, Madre Ercilia Canta no Madre Marinella Castagno ne’ebé ita hotu koñese, mate iha 5 Fevereiru 2013. Aleinde ne’e nia mós hanoin ita-nia irmán dahuluk sira hanesan Madre Enrichetta Sorbone, Madre Marina Coppa, Madre Angela Vallese, ne’ebé tinan ne’e selebra tinan 100 ida mate nian.

Madre Jerál iha ninia liafuan, nia dehan katak, Maria la’ós pasiar de’it iha uma ne’e,maibé iha uma hotu Institutu nian, Maria kontinua pasiar no tau matan mai ita, ohin. Nia konvida atu hafoun konfiansa boot ba Maria no husu tulun ba Kapítulu Jerál.